Een nieu Guese liede boecxken

Den [ij.] Psalm van Ducdalbe,

op de wijse vanden li. Psalm, ontfermt v ouer my etc.

Vermaledijt is die huer ende tijt,
Dat ick int Nederlant oyt ben ghecomen,

[fol. 3r]

 

Dat my die Jnquisicy sonder schromen

 

Oyt heeft vercoren, dat my nu wel spijt:

 

O ick onsalige meynde subijt

 

Tlant geheel tot mijnen profijt te winnen

 

Maer ic ben alder menschen herten quijt,

 

Crijch ick geen troost, so verlies ick mijn sinnen.

 

 

 

Al heb ick veel onnoosels bloets vertreen

 

Gebrant, gedoot, geworcht ende gehangen,

 

Veel Edelen, Ja Grauen int verstranghen,

 

Gebracht, end ts'lants Privilegy met een

 

Te niet gedaen, end veel maechdekens reen

 

Tot schand gebracht, ende oock die Ord[e] der Staten

 

Gantslic veracht, dit deed my vreese geen,

 

Had ic den Thienden Penninc na gelaten

 

 

 

Dees Flamingos, dees Luthrianen onvroet

 

Cond ick onder mijn Tyrannije plagen,

 

Al had ick al die vromen doot geslaghen,

 

Niemant en rebelleerden mijn gemoet

 

Tot haerder schande, end al haer gebroet

 

Moesten sy onder d Jnquisicy beuen,

 

Een Engel was ick voor haer oogen soet,

 

Nu een duyuel, niemant en gunt my tleuen.

 

 

 

Vervloeckt moet zijn die dach ende die nacht,

 

Datmen in Engelant mijn gelt heeft ghehouwen:

[fol. 3v]

 

Dit heeft dat quaet altemale gebrouwen,

 

Dat ick haer Mammon moest roeren onsacht:

 

Tbederuen haers Lants hadden sy geen acht

 

So lang ic haer by den Vleespot liet blijuen

 

Maer nu ic haer Mammon aenroer met cracht,

 

Willen sy my wt de Landen verdrijuen.

 

 

 

Prinslicke Paus met al v Santen vry,

 

Bidt, leest, en smeeckt, en wilt Processy voeren,

 

Bidt Sinte Ludtsaert Maerschalck van v Hoeren

 

Juth, Claes, en Pieter, end Sante Soffy,

 

Nostra Senora de Valladoly,

 

End oock Sint Joriaen, daert al moet voor vreesen,

 

Hondert duysent Sielmissen doet voor my

 

Ende laet Granuella dat Requiem lesen.

Liefde vermacht al fecit.