Nieu dubbelt Haerlems lietboeck, ghenaemt den laurier-krans der amoureusen

[Hoe legh ick hier in dees ellende]

Voys: Met recht mach ick my, &c.

HOe legh ick hier in dees ellende
Van mijn vijf sinnen gantsch berooft,
Komt siet my aen ghy aerdtsche bende
Die van de wereldt wort verdooft,
Ghy die altijdt in ydel saecken
Soeckt uwen gheest soo te vermaecken.

De Zee Spreuen met haer soet singhen

Verdooft den Stier-man soo den gheest,
Dat hy zijn Zeyl niet kan bedwinghen,
Maer moet vergaen door storm tempeest:
Soo doen zy die door ydelheden
Verliesen haer verstant en reden.

Wat heb ick schoonen tijdt versleten

In't vercieren van mijn Lichaem,
Dat wordt nu van de wormen ghegheten,
Want haer de spijs is aanghenaem:
Maer niemandt hoeft met my te spotten
Want yder moet in d' Aerde rotten.

Mijn schoon hayt dat soo plagh te krollen

Vercierde seer mijn Ieughdigh hooft,
Dat salmen sien op 't Kerck-hof rollen,
Als d'Aerde dat heeft af-ghestooft,
Mijn schoon Coleur is gantsch verlooren
Sterven moest ick, ick was ghebooren.

Mijn Lidtmaten, ('t is te beweenen)

Daer ick mee dansten pertinent,
Dat worden nu verrotte Beenen,
Door den tijdt in d'Aerde gheschent,
't Vleesch datter veel plagh aen te locken
Leydt nu in duyster Aerde ghetrocken.

Mijn klaere stem als klinckende snaren

[p. 5]

 

Is al vergaen als roock of mist,

 

Wildy nu sien waer 't is ghevaren?

 

Komt in mijn graf, opent de kist,

 

Daer sult ghy sien dat veele Wormen

 

Mijn lichaem gruwelijck bestormen.

 

 

 

Mijn oogen die door soete loncken

 

Verwonnen meenich minnaer 'thert,

 

Sijn voor de wormen nu speloncken,

 

Ende bedeckt met aerde swert,

 

Mijn Wangen die plachten te bloosen,

 

Sijn nu vergaen gelijck de Roosen.

 

 

 

Mijn roode Lippen en witte Tanden,

 

't Verciersel van mijn lieve mont,

 

Mijn welgemaeckte schoone Handen,

 

En fraey besenden Borsjes ront:

 

Sijn al van d'Aerde in geswolgen,

 

Een yeder denckt dat hy moet volgen.

 

 

 

Al mijn Huysen en schoone Palleysen

 

Besluyt ick nu in eenen hoeck,

 

Mijn schoone kleeren wilt overpeynsen,

 

Sijn nu maer eenen Linnen doeck,

 

Mijn reuck en verwe gecalandert

 

Sijn al in vuylen stanck verandert.

 

 

 

Heb ick int quaet of goet bedreven

 

Daer af sal ick nu loon ontfaen,

 

Oock rekeningh geven van al mijn leven,

 

Mijn ziel moet voor den Rechter staen,

 

Sal 'sweerelts goet my dan doen voordeel

 

Als ick moet hooren sijn strenge Oordeel?