Nederlandse historische bronnen 4

[p. 73]

53 Willem van Oranje aan Jan van Nassau Antwerpen, 1 juli 1579^53*

Monsieur mon frère, Ayant à cest instant des nouvelles que le lundy dernier au matin la ville de Maestricht auroit esté surprinse par les ennemis du costé de la Hochterporte¹¹² ou l'on ne tenoit point de garde, j'ay bien voulu vous escripre ceste, ores que n'en sachions encores les particularités au vray, ny mesmes si ceulx de la ville tiennent encores le Wijck ou non. Affin que veuillez adviser d'y mettre le meilleur ordre par dela que possible sera, et pour cest effect envoyer promptement es villes de Venlo, Wachtendonck et Gueldres bonne forte et gagliarde garnison, qui sera le moyen de faire perdre l'ennemy l'envie qu'il pourroit avoir de s'attaquer à aulcune desdites villes, quant il verroit que les villes fussent bien pourveues de gens et de choses necessaires, la ou le faulte de cecy il est bien à présumer que l'ennemy entreprenant de venir par donneroit grand estonnement aux villes, qui est cause que je vous prie d'y pourveoir au bon escient et avecq toute diligence, nous donnerons icy tout ordre possible de nostre costé, pour lequel effect nous faisons icy venir trois regimens laissant ung des quattre pour pourveoir le pays de Geldres à l'effect susdite - - -

[Postscriptum:] Monsieur mon frère, depuis ceste escripte s'est advisé pour le meilleur d'envoyer le quatrièsme regiment assavoir de Stenbach¹¹³, dont vous ay faict cy dessus mention, en la ville de Bois le Duc, soubs espoir que vous aurez moyen de furnir les villes surmentionées les aultres compaignies lesquelles il vous plaira assembler de tous costez, que si toutefois vous aviez necessairement affaire des trois aultres, vous me pourrez mander lequel puisse icy régler. Datum ut supra.

53* KHA, Inv. 3, nr. 897⁷. Expeditie.

112 De Hochterpoort of Bospoort te Maastricht.

113 Jacob Steinbach, overste.