Nederlandse historische bronnen 4

[p. 66]

45 Willem van Oranje aan Jan van Nassau Antwerpen, 9 maart 1579^45*

Unser freundtlich dienst undt was wir sunst mehr liebs undt gudts vermögen jederzeidt zuvor. Wolgeborner, freundtlicher, lieber bruder. Wir haben E.L. schreiben empfangen⁹⁸ undt daraus verstanden im massen sie etlicher beweglicher ursach halb in Deutschlandt sich zu begeben gemeint sein. Darauff wir nicht haben underlassen wollen E.L. zu wissen zu thun, ob wirs schon vor gewiss darvor halten, es solte E.L. in vielen sachen, so diesen landen zum besten gereichen undt daran merglich undt hochlich gelegen, alle gute beforderung undt ersprieslichen nutzen schaffen; jedoch dieweill sich der feindt nhunmehr mit seinem hauffen, wie E.L. zweiffels ohn albereidt werden vernommen haben naher Mastricht zu begeben undt dieselbige stadt zu belegern in willens undt entlichen entschlossen ist, undt dan im durch keinere bessere undt fuglichere mittell dero orth dan durch E.L. undt des furstentumbs Geldern gute hulff undt versehung begegnet mag werden, also haben wir doch auff E.L. verbesserung vors nutzlichste angesehen, Sie hetten die ermelte reise grosseren unrath, der darzwischen in ermeltem furstenthumb erstehen mochte, zu verhuten, in allewege bis auff gelegenere zeidt ausgestellet undt, dieweill nuhnmehr die zeidt zu bawen undt zu befestigungen zu versehen bequem ist, undt die gelegenhaidt erfordert, das mit allem ernst darinnen versehen werde, die gute ordnung verschaffen lassen, damit die Stette Geldern, Venlo undt Wachtendonck in aller eill undt mit genugsamer anzall volcks weren befestiget worden, dieweil ermeltem furstenthumb an denselbigen orten so merglich gelegen undt die uncosten in andrem wol eingebracht und ersparet mogen werden. Darneben hetten wir da es E.L. fuglichen zu wegen bringen khundten vor gut angesehen, Sie hetten auff solche mittel undt wege getrachtet, wie das hauss von den Schencken hetten bekhommen mogen. Unst dieweill nuhn diese sachen, wie E.L. guts wissen dragen, alle eill undt ernstliche beforderung erheischen, wollen wir verhoffen, E.L. werde gute versehung thun, das daran kein mangell sein werde.

[Postscriptum:] Hierneben wollen wir E.L. gebetten haben, dieweill wir alhie alle gelegenhaidt der stadt Mastricht sehr schwerlich wissen mogen, es wollen E.L. mit inen gute correspondentz halten undt uns darab bey zeidt undt gelegenhaidt vergewissen.

45* KHA, Inv. 3, nr. 895¹. Expeditie, waarop aangetekend: ‘Recepta 13 martii to Amersfort’.

98 Zie hiervóór nr. 39.