Advys aan de modewerksters.
Geer auwers die door eur kinder, vader, mooder, peerke of meerke geneumd weurt, trek allemoal, zonder ug te commandeere, eur schild in. Van dat momint oaf zeet geer Papake en Mamake; mer opdat die subite metarmorphoos van noam gein noadeilige influentie op den handel zouw exerceere, doot ug dan de meuite oan, van dit, of door de Momus Annalen of wel door de stadsblaaijer, te loate annonceere, want anders zouw de commercie, die al door ein ordentelik verval van krachten geploagd is, heur doed er bij vinde.
Doa kwoam onlangs ein mooder, die door het innumme van de plaat zich oug mamake had doen neume, met heur deuchterke in einen modewinkel oangestieveld um dat good keend ein heudje te koupe.
Verscheye heudjes woorde dat jufvruike veurgezat, mer dat good ding, wat al veuls te veul in heure knikker had, vond op alles get te zegge. Nein, dat is mig te simpel, nein, dat is mig te zier gechargeerd, dee booijem geliek frappant op ein kaanjelpiep, dee maak mig zoe roed es ein kreef, dee gief mig eine blouwe weerschien, etc., etc., etc., tot dat eindelik heur het heudje in 't oug viel, wat alle verlangde kwaliteit bezoat; mer ongelukkig dat heudje ruukte noar cente, en Mamake, dat neet hiel scheutig gevalle woar, had liever gezeen dat heur deuchterke, dat oet fijne oranje van den hoege baum oaf Mamake speulde, ein van die ierste heudjes genommen had. Door die verschillendheid van opinies ontstond ein klein kebbelerij; de modist, dinkende het in 't good te legge, zag: allon jufferke bit al ins door eine zoeren appel en numt het heudje dat eur Mooder....... Op het woord van mooder, noame mig die twie gooy Dames hun byn onder den erm, en goave zich oan het loupe as of get koets achter hun zoat.
O tempora, o moribus, wilt geer wel geluive dat dat ongelukkig woord van Mooder schuld is gewees dat de modist veur altied de klandisie van die familie verloren heet?
Auteursrechtvrij