Moetete (1968)

[p. 21]

Vene
[Fajabron]

Fajabron
lon lontoe ini joe ati
rigeri
seki joe bribi
nanga ala joe lobi
poti joe na broeja
kweki prakseri
taki no wan de
di e weri en srefi
nanga joe
no wan di e wakti
no wan di e misi
no wan di e si joe
na joe seti koiri
ini den langa
doengroe strati
joe wawan

*^**

Te fajabron
rigeri ini joe ati
bron den skotoe trowe
di be benawtoe joe so

te asisi di libi
loesoe en tjobi krakti
kon moksi nanga a doti
foe joe ati njanjangron

pransoen e poeroe ede
kon na doro
njoen bribi
foe ten di e kon