Moetete (1968)

[p. 46]

Trefossa
Owroekoekoe ben kari

Sonte moen no ben sa skein so sari a neti dati, ef wan pkin workoe no ben drif' kon let n'en fesi.

Boesi ben kon tron wan spoekoe-spoekoe doengroe ipi; i ben kan jere fa dowatra b'e dropoe fadon na den wiwiri, nèlek na djoembi b'e waka na tap den finga-ede.

Liba b'e lon, foe di joe sab tak a'e lon... noso joe ben sa prakseri nomo tak na wan bigi spikri, di sontron na son presi b'e proi-proi sorfroe-sorfroe, te wan safri winti saka kon te na ondrosé.

Ma ini a saf-safoe tiri disi, nèlek na now fosi grontapoe b'e bigin, wan gitar ben bigin pré èn wantoe jonkman b'e singi na singi di wan f' den ben meki so djonsro-djonsrode.

A singi b'e ferteri fa pranpran liba ben kon krasi, f' a opo mofo swari na lai, bifo boto doro Posoe... a lai di ben moes jep tjar a moni kon, foe bow wan oso gi wan lobi-lobi oema.

Sonte, ef moenkenki no ben skein so sari, a singi ben sa de wan tra fasi. Ofoe kande sani waka so foe di owroekoekoe ben kari, bika te owroekoekoe kari, dan alaten joe prakseri e drai go n' a doengroe foe dede.

- Soema n'a wroko mek a kon! - na so a fowroe disi e kari. Na so mama ben leri foe granmama, èn na so a ben ferteri en pikin baka. En na baka kari foe owroekoekoe alaten wan sari sani b'e pasa.

A no ala mofoneti Loeti b'e tjar en gitar kon, dan den no b'e singi someni, ma Dorsi b'e ferter tori. Te en sten ben kon na fesi, ala trawan b'e tapoe. Den ben lobi fa den skin b'e gro, te Dorsi sten b'e saka gwe te wan frede-tori b'e kon. Te na tori ben kon span let-leti, den b'e fergiti foe ari bro. Ma a watra b'e tan nak-naki nomo-nomo na sé den kroejara na lanpresi. Dja den jonkman ben kan loekoe go na liba, ma den ben kan si toe den redi-redi kokolampoe faja foe den pkin masanga.

- Joe no sa si koemakriki tak wan sma tai en boto na Knofroe - so Dorsi b'e ferteri. - èn soema abi gron dape? Kaba foe taki leti, a doti foe dape moe boen sref-srefi. Ala sma frede na bigi faja foe owroeten, di katibo ben de. A bigi faja di son neti pranpran ben kan fré psa abra den kenfiri, ma di b'e dede, bifo joe sabi leti ef joe si en. Den waktiman b'e frede èn den dagoe b'e knoroe-knoroe safri nomo.

- Débroko mamanten ala sma b'e taki foe na asema di kon baka èn ala ongoloekoe den b'e fringi na en tapoe.

[p. 47]

- Namkoe den takroe-doe foe driktoro. Broedoe di en ben lasi, a b'e poeroe na trawan skin, bika sma ben sabi taki na foe soigi driktoro ede asema b'e kon. Ma blank-ofsiri ben teki rai foe na owroe kron nengre Asabi, di ben de wan mati foe en.

- Boeba foe asema, di a sa poeroe kibri, joe sa soekoe na ini owroe mata. Dan joe sa poti sowtoe.

We na so den weti man foe pranasi ben kon graboe asema wan neti, ma na tra mamanten a ben gwe krin-krin komoto na den mindri. Sens a ten dati a b'e spoekoe kfalek na Knofroe. Wan baka trawan den sma b'e dede, nanga ala di, lek fa den b'e ferteri safri-safri, driktoro ben pai gron, dipi na mindri boesi, nanga broedoe foe wan nengre, di a ben kiri. -

A neti foe na tori disi, di den jonkman b'e pari go na oso, den skin b'e gro, ma no wan f' den b'e tak wan wortoe f' dati.

Na moenkenki neti Loeti no b'e kon so foer-foer moro n'en mati. Den ben sabi f'a b'e weri, foe di a b'e wroko tranga; dan te bakadina a b'e kot wan pis presi opo na libasé.

- Foe prani - so a b'e tapoe den aksi foe en mati, ala di a ben sab tak a no ben kan drai den ede nanga dati.

Te wroko ben weri en, a b'e go drai-drai pkinso na birman oso. A ben mag foe bori en njanjan na birman brantmiri.

Birman no ben de goedoeman. Wi ala, so Loeti b'e prakseri nofo tron, di e libi na pranasi, soema foe wi na goedoeman? A no stré nomo wi abi foe stré wi libi langa nanga grasi, kapoeweri èn pina?

A moro pkin nofi sproiti foe birman b'e sdon n'a doti gron. A b'e kwinsi na papa alési, di nanga béf-béfi anoe a b'e tjar go na mofo. Ala en fesi den alés'siri b'e fas-fasi.

Te a pkin ben poesoe na breki kon fadon, a b'e naki en anoe foe prisiri na ini na watra. Dan wan foe den moro bigiwan b'e ari en go pkinso moro fara, nanga ala di a b'e lolo a doti empi tron wan toemsi bigi koendoe n'a pkin mindri baka.

No no, Loeti b'e prakseri, no sol Na ini mi égi oso ala sani moe de moro moi.

Na den joeroe disi a b'e sab taki, na opo liba wan sma b'e wakti en tranga-tranga.

Te a b'e prakseri den san disi, dan ala ten a b'e firi fa en broedoe b'e kon moro waran.

Lek fa Loeti ben gwenti, fo sabaten a b'e krin en kroejara, bika te a b'e go na doro, te neti en krosi no ben moe doti.

Den jonkman ben sabi now boen-boen, san ben de foe doe nanga den mati, namkoe sens a grandinari-brada ben ori wan langa taki nanga en. Boitdati, di domri ben kon, den ben si tak den mati ben go na kerkikantoro nanga en karta.

Loeti ben sa go na waka, a bjo go na foto. Te neti, te a b'e si den redi-

[p. 48]

redi faja foe den kokolampoe, dan a ben sab tak den faja foe foto ben de tra fasi: moro foeroe, moro krin! Namkoe den faja foe den kino a ben lobi, nanga den foeroe-foeroe sma, nèlek fa sontron ondroondro asedje b'e panja na den stratilanteri. Loeti prakseri na en srefi tak a b'o bai wan boen lampoe.

Agen moenkenki b'e dongo kon. Agen den mati ben kon na makandra na ondro den wawai foe den morisibon na lanpresi, foe ferteri èn singi. Loeti no ben de nanga den. A ben saka gwe nanga kroboi fara.

Saf-safri en pari b'e poesoe a pkin boto nanga lai. Tokoe sontron a b'e ari wanwan stéf pari, te a watra di b'e djompo boen é, b'e fadon lek bigi dropoe na en baka. Dat b'e psa te a tiri bréti di a b'e bréti den ten disi, b'e bewégi na ini en skin. Dan a ben gersi lek a b'e sribi gwe, èn a b'e tan lek a watra b'e kar en prakseri pasa den someni oekoe foe liba go lasi te n'a kroboi lin foe loktoe nanga se.

Wan star ben soetoe. No wet-weti, ma krin, nanga ala di moenkenki b'e skein. Nélek foempéri, krosbé. Wan momenti leti ben krin a kontren, mek a kon tron wan pkinso moro troe sani. Na momenti disi Loeti kis en srefi, tak a b'e psa watrasé foe Knoefroe. Now fosi a b'e si den fajaworon nanga den asedje di b'e gi faja. A prakseri Dorsi.

Asema.........

Na troe?

Now ten no ben de foe swit prakseri.

Na ini a kowroe-kowroe neti disi sweti foe dede b'e broko en skin: a b'e psa watrasé foe Knofroe èn a ben si wan faja.

Loeti no b'e pari moro. En boto b'e dribi nomo nanga farawatra. Frede ben bradi ensrefi na en tapoe, nèlek boesi-anansi e span en takroe blaka foetoe na tapoe wan n'njan di a feni. A no ben sabi tak en boto b'e soigi watra now toe. A lapoe foe toko-toko no ben jepi.

Di a firi en foetoe e kon nati, a frigiti tak kande a ben kan poeroe watra ete. A djompo g'a watra.

Ma na watrasé foe Knofroe oen ben de...

Owroekoekoe ben kari èn den mati di b'e singi, ben panja nèlek ibriwan foe den ben wan kibri ensrefi na ini égi masanga.

Ma baka foe dati ala sani b'e sribi na ini kowroe foe moenkenki. Soso wan langaneki palmbon nomo b'e bewégi nèlek a ben wan lakboroe wan pkin doengroe workoe poeroe na loktoe.