Moetete (1968)

[p. 37]

Josef Slagveer
6 april 1968 na kownoestrati

Na dé baka na kiri foe datra Martin Luther King

Mi nanga Loeti tanapoe na ondro wan foe den lanti lanteri na kownoestrati e gi tori.

Na dape wi gwenti foe mit' makandra ibri mofoneti, na dape w'e prati gi makandra wi mofo-koranti foe na dé.

Loeti na wan ipsi, moi fes' pranasi nengre. En fesi e mek' joe prakseri den kownoe foe Afrika, di joe kan si sontron ini den prenki-boekoe.

En sten ebi èn tranga. Dati wawan e dwingi joe foe respeki en moro lek' joe ben sa wani.

A no tide mi kon ler' sab' Loeti. A trow nanga wan sisa foe mi, ma fos' dati mi kon ler' sab'en boen na skoro-bangi.

Na so wi kon gwenti makandra èn a kon tron wan swit' gwenti f'oenoe, foe w'e mit' makandra ibri mofoneti na ondro wan foe den lanteri na kownoestrati.

En ibri neti baka Loeti moes' foe bigin en tori nanga wan sari it' ai na en skoro-ten.

‘Jongoe Waldi, na ten di wi b'e go na skoro ben de wan boen ten, wan respeki ten.’

‘Joe ab' leti Loeti.’

‘Ma na ten kon drai now.’

‘San p'sa dan baka Loeti?’

‘Na boi f'mi: Roi, - na fos' wan - kon kis', so p'kin lek' a de, wan sort' bigiman fasi, dat' mi srefi no man froestan fa dat' doe kan. Den moes' e por' na boi na skoro.’

‘Mi no prakser', dat' skoro sa doe so wan sani, ma so lek' faj' taki: Na ten kon drai. Sranan foe tide no de moro Sranan f'esrede èn a no Sranan wawan jèrè, ma er' grontapoe kon kenki so.’

‘Dat' de troe Waldi, bikas' fosten ef' toe sma ben sa ab' wan p'kin kese-kese joe no afoe frede, dat' soetoe sa kon fadon in' na tori disi, ma dis' ten den man n'e drai-drai sref'-srefi moro foe sen' joe go na den afo foe joe.’

‘Ma fosten den b'e wisi sma kiri lek' kras'tigri. Ma Loeti joe ab' leti na ten kon drai. Kande joe sab' fa dat' doe kon toe, dat' den sma kon kenki so?’

‘We, mi f'mi sé prakseri, dat' na loekoedosoe e por' den sma moro foeroe. Boen nanga takroe, ala sort' prenki den sma e sor' joe. En mi

[p. 38]

no wan taki, dat' den no moes' foe sor' den sort' prenki dati, ma d'e drai den prenki froek' froekoe te den p'kin de na ai ete èn dat' no kan boen noiti!’

‘Ma Loeti, joe no kan tap' den sma foe den no drai den prenki, di joe n'e fen' boen. Ma joe leki p'pa, joe moes' foe loekoe joe p'kin boen.’

‘Dat' de troe Waldi, ma joe sab' toe fa den sort' tori disi e waka. Moro foeroe na den p'kin nanga den m'ma de na oso. Ibri neti let' dja mi def' feni, e gi tori.’

‘Saj' taki de troe. A de fanowdoe foe ibri m'ma nanga p'pa moes' sorgoe foe den p'kin no tron sneki, bika te joe kweki sneki a sa tron aboma. En ibri sma sabi taki, aboma e swari sma.

Ma wan er' tra pis' tori Loeti: Faj' fen' na dede foe Martin Luther King?’

‘Uhmm...... boi!’

‘A mek' joe soktoe.’

‘Troetroe a mek' mi soktoe, bika a sani di wet' man e pré nanga nengre now kon moro mofo.’

‘Fa so?’

‘Na fa so j'e aksi mi? We mek' mi froeter' joe taki na tori disi kon tron wan sar' anansi tori.

In' a tori disi anansi na wet' man, ba tigri na den nengre èn ala lési anansi e njan wan p'kin foe ba tigri, ma ba tigri n'e tak' noit' wan sani, lek' a de begi nomo, te anansi kon njan ba tigri srefi.’

‘Ma san tigri ben sa moes' doe Loeti ef' anansi ab' makti moro tigri nanga en p'kin?’

Gi den p'kin foe tigri gon, gi den nengre gon - bika mi lek' nengre las' mi bribi in den wet' man.

Den poer' den wet' maskradoe èn kir' wan foe den edeman foe den nengre baka.

Foe troe Waldi, mi las na pikinso bribi, di mi ben ab' in den wet' man tak' den ben sa wan libi nanga wi lek' libisma in' krin.

Gi den nengre gon foe den kan tek' wan toe nanga den go na ini grebi.

‘Mi no kot' joe mofo, ma...’

‘Mi sab' san joe wan taki Waldi. Dat' m'e disko. Ma m'e aksi joe now: Soema de den moro bigi disko-man na grontapoe moro lek' toe ondro jari k'ba?

We mek' wi nengre disko foe wan momenti in' wi libi. Boi... joe no sabi. Den gi den nengre, mi nanga joe toe, kerki nanga wan wet'gado nanga wiwiri na tap' en ede, di wan nengre noit' sa man abi.

Den gi oenoe wan wet' gado foe wi kan fen' trowstoe te den soet' wan foe wi kiri.

Foe wi kan pot' wi sari in' kerki-singi èn baka den wet' maskradoe foe den d'e laf'oenoe.

[p. 39]

Ai Waldi den pansboko di wi afo b'e kisi nanga wipi kon kenki now in' pansboko nanga wortoe, nanga koegroe. Fonfon foe pina nanga koegroe d'e fré mit' den Amerkan-nengre. Esrede den soet' King kiri, tamara den sa soet' wan tra nengre èn tide d'e prakseri fa den sa moes' kir' den trawan.

En wi sa go baka na kerki, begi wan wet' gado - di n'e jere blakaman. Moro tranga w'e saka wi jeje dé foe dé.’

Loeti ai ben kon foeroe nanga watra. Den wortoe, di a ben taki ben boro p'sa in a neti lek' wan nefi.

A ben kar' en djodjo kon na loktoe foe a ben tak' s'a ben moes' foe taki.

Na neti, lanteri nanga mi wawan jere a sari ati foe Loeti. Den oto, den sma nanga den dagoe pasa na mi sé, sondro foe mi sab' dati. Kownoestrati ben de wan in' oso gi mi. Wan in' oso nanga bigi sari. Mi ati ben kon foeroe mi no ben man foe piki Loeti wan boen fasi. A ben kon lati k'ba.