Middelnederlandse geneeskundige recepten

848. Dit doet swellen slinken ende driuet wech.aant.

Nem oly rosaet ende bestrijc. Item met oly violaet bestrijc oec. Item popelioen⁶⁰ verdriuet oec gheswel⁶¹. Item een plaester van des donres baerde ende twitte vanden ey daer toe ghemenghet met witten wijnnedic. Item polipodium met wijnnedic. Item bloemen van coel ende wijnnedic. Item reg bloemen ende edic. Item aertbeyen ende wijnnedic. Item een cruut ghescepen als billen mer⁶² ten bloeyt nyet, dat verdriuet gheswel bouen al. Item honich ghescuumt al siedende wael reyn ende daer in ghesoden grof ende comijn verdriuet gheswel⁶³. Item cipres appel ende endiui ende weghewise. ende wijnnedic te gader verdriuet gheswel. Item rose water verdriuet oec. Item mannes orine seer ghesoden ende daer in ghenettet enen witten wollen doec, ende op gheswel gheleit, verdriuet wel of het doet wtbreken. Item weghebrede ghesoden met wijnnedic, ende die gheleit op een clier, doetse veruaren.

60 Voor popelioen staat in het Hs. pole doorstreept.

61 gheswel] het Hs. heeft ghesuuel, waarin uu de waarde heeft van w.

62 mer] het Hs heeft met.

63 Vóór gheswel staat in het Hs. ghj doorstreept.