Middelnederlandse geneeskundige recepten

452.

¶ Netel water es goet des winters hande of voete, mede bestreken, daer men groete coude in gheuoelt des auens alsmen slapen ende smorghens alsmen vp staet. Oech plecht ment wel te drinckene met wine, die ghene die zeere vercoudt sijn dicke. Men salre oec mede bestriken slaep ende kele, den ghenen die zeere bloeden ter nose of ter kele. Ende oech eest den ghenen goet die ghewont sijn ende zeere bloeden, met eenen doecke dair in nat ghemaect.