Medische en technische Middelnederlandse recepten

958. Teghen dy wyck.aant.

Dy wick plach te wesen ynt worste lyt van den menscen, ynden vynger of in pollice. Den wick kentmen aldus: hy plach yrst tsuellen sonder swellen, yst been, zenen, wleysch, bloet, altsamen alsoe seer dat dy mensce steruen wyl van wedoen, ende begint dan een luttel roet twarden ende als hy gesuoren heeft omtrent .vj. of 7 dagen, soe begynt dy wick tswellen soe lanck so meer ende roet to werden. Den wick verslaet⁽³⁵⁰⁾ men aldus. Als mens gevaer werdet tcommen, so stamp den cop vanden vlieder ende legget (fol. 93^r) myt sappe myt al opt seer volcomelick, ende dy doet twewerf sdages, het sal te nyte gaen bynen .x. of .xij. dage. Ende yst sake dat dy wijc den hoefde wart trect ende wt breken wyl, so stamp apye ende mengense myt tarwe blommen, myt vrouuen melck ende myt seem, ende machter een deech af, ende van den dege macht dunne koegkens, ende legt op den wyck ende vermact swynters tweuerf, sommers drywerf. Ist dat hy seer droget ende vaster dooet wleysch yn, soe legter calmi op of groen vlieder, soe neem den witte vanden poreye ende lecht dar op gheplaestert, tsel thant genesen.

(350) verslaet: het Hs. heeft verstaet.