Medische en technische Middelnederlandse recepten

737. Aqua matricarie.

Ys gemact van maters ende is seer goet tot woele saken bynnen ende buten den licham. et sic fit. Recipe dy blomen ende dy maters bladen, stampse ende doetse yn eyn klocke. Dyt water is van voelen⁽²⁸⁸⁾ virtuten. Want wy dat nuchteren drinct elx dages hyr verlinget seer syn leuen. Want wyet drincket diickwil hy is versekert vanden ga doet. Ende is goet ter veruulder magen ende benemt dy dwallinghe vanden herten ende confortirt dy hersen ende maket gueden syn. Ende scerpt⁽²⁸⁹⁾ het syen. Ende doet scheiden grote groue winden ende maket guden adem. Et curat yctericiam. Ende doet sitten gaen dy op risynge vander moder. Ende doet dy vrouue hoer blomme commen ende benemt dy zweringe inder leenden. Et curat colicam passionem.

(288) voelen: v verbeterd uit w.

(289) Na scerpt staat in het Hs. dy sy doorstreept.