Medische en technische Middelnederlandse recepten

734. Aqua celidonie sic fit.

Recipe celidoniam mitter wortelen ende distillirt. Dyt water is van groter virtuten beyde bynnen ende buten. Ende is guet ten oghen want het scerpet dat syen ende suuertse ende droechtse. Ende suuert oeck cancker ende fistel, dwaetmensee daer mede. Ende het is guet tot scorfheit dy van colden comt, ende ghenest dy scellen op dy oghen ende opt hoft ende onstopt lever ende longe, dy milte, dy blase, ende dy nyren alsment drincke nuchteren ende suuert dy moder van wulheiden ende van vercoltheiden⁽²⁸³⁾.

(283) vercoltheiden: v verbeterd uit w.