Medische en technische Middelnederlandse recepten

606. Formen om loet of tyn yn tho ghieten.

Recipe een tynnen of eyn loden wat, ende snyt eyn ansicht of eyn beelt of .j. beest of wathet ys ende legget op eyn steen dy recht ys ende ouerstricket myt oly ende legget dar op eyn papyr in water ghenettet, ende wt gewronghen, ende plaet dar ouer gesp<r>eyt, al ouer dat beest, dar nae dat ghy w form hebben wylt. Dan nemet eyn borstel ende drucket dar mede wel aen in alle hoken. Dan nemt eyn blat papirs ende stotet of wryft al cleyn oftet pap war, ende dat doet myt water ende dan wriuet water al schoen wt, dan nemt wyt vanden eye ende dar mede doet allenken luttel daer ouer dat vorscreuen belde ende duwet heerde toe, dat dy form sterck genoch werde. Meer dat belt sal yrst gesmert syn myt oly als vorscreuen ys. Ende dan (fol. 41^v) nemt dunne spaemkens ende smert dy ock myt oly ende stroy dy ouer dy

[p. 195]

forme ende bintse in alle hoecken myt gude coerden. Ende yst noet, soe bynt dy steen dy dar op gemact ys oec wast ende bliuet dar yet dat nyt weel aen en gaet, soe steket dar kilen van hout tussen ende dwinghet aen all waeste dat dat papir dat water ontloept. Dan settet yn een wermen ouen ende laetse weel drogen, ende als sy droghe ys, dan nemse wt ende ontbint dye forme. Ende als ghy ghyten wylt, ende ghy wylt dat dat beelt hool blyeft, soe gytet sy wol ende latet sy een aue marien staen, dan ghitet weder wt, dan bliuet dat belde hol. Mer wyldyt nyt hool hebben soe latet wol staen ende ghitet nyt wt. Aldus ghitmen alle dinck watmen wyl wan kinderen kermes of ander dinghen.