Medische en technische Middelnederlandse recepten

[p. 186]

568. Vater daer men haer mede afdoet.aant.

Wildi ymant haer af doen ende een safte huut maken sonder wrese, soe moet hy eerst baden in warm water, daer nae stauen ende sweten ende dan noch baeden. Daer nae moet he heem droghen myt enen cleden, ende dan saltmen bereit maken of hebben daerment haer mede af wil doen gaen. Men maket aldus.

Recipe leuende calck daer nye water op een quaem ende wriuet weel cleyn, ende dan tempert myt colde water ende doet [op] tfuer, ende doet gelick enre wellinghe. Dan doeter thoe het fiften deel alsoe woel operments, dat is auripigmentum, als des calx is, ende sydet daer mede. Dan (fol. 35^r) nemt eyn panne ende stechse daer yn, gaen dy plumen of, soe settet aff want sydet langer, het solde thoe seer werhetten. Ende alst weel nae coldt is, soe stricket daer ghy dat haer af wylt hebben. Ende dan pruuet oft haer lichtelick wt gaet, soe trecket wt sonder crouuen, want dy hute solde lichtelick schoren ende breken. Daer nae neem billen cruyt sap ende nachtschade sap ende donrebarden sap, dat is huysloeck, ende bloet wan eyn wleder muys, dit menget al tsamen ende bestryket dy stede daer mede, soe waest daer gheen haer weder.