Medische en technische Middelnederlandse recepten

539. Om roet bolkeraen te verwen.aant.

So neemt .ii ℔. wilt soffraen diemen floers hiet, ende doet in een saxkijn, dan ghiet water opt saxkijn ende wasschet ende wringet also lanc datter gheen gheel wt en loept mer laet die soffraen een dach ende nacht legghen int water ende dair na doet die soffraen in die sonne ende laet hem droghen. Ende dan so doet hem in dat voirseit saxkijn. Dan suldi dunne loghe maken van potasse .iij. menghelen ende makense heet ende ghieten tot elke mael .i. menghelen op dat voirseit saxkijn. Ende dair na dat ander. Ende dair na dat derde menghelen. Ende hanct elke menghelen bi sonder. Ende dan ghietet tot elke menghelen een derdendeel van een menghelen wijn eeck. Ende in die verwe die ghi lest wt vringet dair wasschet vwe doucken wel in ende vringetse wel wt. Ende dair na doer die ander (fol. 28^v) verwe. Ende dair na doer die derde verwe. Ende allentoes sal die verwe cout sijn. Ende men sal dien douck niet spolen. Ende tot een ℔. lakens salmen nemen een ℔. saffraens of floers.