Medische en technische Middelnederlandse recepten

[p. 169]

511. Thoe maken assijs.

Recipe oleum lini antiquum .j. ℔, vj. loet spigel hars, ende .iiij. loet masticks, ende .ij. loet gumme, .ij. loet wyrock ende .iij. wirendeel loot coperrots⁽¹¹⁸⁾, ende eyn wyrendeel loots terebentyns. In deser maniren salment maken. Al dese dinghen voerscreuen suldi puluerisiren ende mengense mytten olije yn een verglasen poot dy groot genoch ys ende doent syden to dat dy gumme gesmouten ys ende sy, ende dy assise begint toe dicke[n]. Dan nemet vanden wuer ende sighet doer eyn dock ende doet weder inden poot ende latet syden hent bliue staen als ghyet op eyn tenne scuttel druppet, dan doet wanden fuer ende rorent myt enen stocke dar loet an is. Ende dan nemet een korste broots van rogge ghebacken oeck aen eyn hout gesteken. Ende alt ruren sal duren miserere mei lanck, ende dan lotet cout werden.

¶ Wetet als wan ruren yrst eeuen nae mytden broden, dat doetmen daer om, want dat broet ende stock trecken den stanck vanden gumme wt, om dat dat laken, dat men dar mede werue[n] sal nyt een sti[n]cket.

¶ Item dese voerscreuen assise nemet, ende si sal so dun wesen dat ghy daer gheen olij yn dorft doen, ende legget dar golt of siluer op.

(118) coperrots staat boven het doorstreepte wirocks.