Medische en technische Middelnederlandse recepten

467. Aqua lazida.aant.

¶ Zauelboem, ysopo, gladie ende aueroene te samen ghestampt euen vele, ende ouer tfier ghedaen, daer of water ghemaect, dat is van starker naturen ende heet aqua lasida. Het verdriift alrehande hoeftswere dit ene werue des daghes ghenut, verdrijft alrehande coerts so van wat naturen dat hi si, weder heet of cout. Dit selue water ghedronken elkes daghes doet vergaen twitte water ende troede. Lasida anderwerue ghedronken stempt dat roede menizoen ende twitte ende is goede mediciin ieghen die roede bloet sucht ende doet die vrouwen bloeyen die verdroecht sien, is dat sake dats sijs twee⁽¹⁰¹⁾ werue drinken of drieweruen.

(101) Na twee staat in het Hs. d doorstreept.