Medische en technische Middelnederlandse recepten

225. Vanden water corrosijf.aant.

Een water corrosijf dat ten canker of den wolf mach ghenesen ende alle quade gaten ende dat quade vleisch of bijt ende et, dat maectmen dus: neemt wedeasche ende gheb[er]net calc half also vele als der aske ouer een ghemenghet met (fol. 54^r) water, ende daer na doet te viere ende droghet met clenen viere. Ende alst droghe is doet in enen pot, dan set den pot in paerde mis of in een ander stede die nat is tot dattet water wert ende het sel oec water werden: dat water corrodiert ende doet woerten of ende men maecter mede gate int lijf waer so datmen wil.