Historie van Malegijs

Hoe dat Gardimant ende Gardifort, met haren volcke quamen by den coninck Goriant.

DIe coninc Goriant van Mombrant seer ontstelt zijnde swoer bi alle zijn goden dat hi nemmermeer rusten en soude hi en soude wreken die doot van sinen vader ende van sinen broeder op Buevijn van Eggermont, ende op al

[p. 327]

zijn hulpers. Doen seiden die twee ruesen Gardimant ende Gardifort datse hem helpen souden met .xxv. M. mannen van wapenen. Die coninc dit horende verblide hem seer ende seyde. Waer nu hier Morgalien u broeder so waert al hier. Doen seide Gardimant. Laet onsen bode daer reisen ende seggen hem dat hijs niet en laet hi en volge ons met zijnder macht na Eggermont om te wreken die doot van onsen broeder coninc Putiblas die Malegijs gedoot heeft ende verbrant. Die bode is gereyst so lange tot dat hi quam int lant van Arabien daer des ruesen casteel stont dat seer sterc ende onwinlick was, ende hi is gecomen aent casteel ende heeft aen die poorte geclopt. Die poortier den bode siende wert hem kennende dat hy Gardifort bode was, ende heeft hem in gelaten, hem vragende wat hem beliefde ende van waer hi quam. Die bode seyde, dat hi sinen here Morgalien spreken moeste: want het nootsake was. Die poortier is binnen gegaen ende hevet sinen here geseyt hoe datter een bode was van sinen broeder Gardifort, die u haestelicken spreken moet. Ende mettien is Morgalien ter poorten gegaen ende hiet den bode willecome ende hi vraechde hem hoe dattet met zijn broeders was. Die bode seyde. Die twee zijn gesont ende die derde is ghedoot. Die ruese vraechde wie dat was. Die bode antwoorde. Heer het is u broeder Putiblas die verradelic verbrant is, ende met hem die coninc Yvorijn vermoort, ende dit hebben ghedaen die tovenaer Malegijs Vivien broeder, ende Buevijn van Eggermont zijn vader ende Aymijn zijn neve Viviens sone. Ende om dit te wreken so hebben u broeders met den coninc Goriant van Mombrant hem reede gemaect wel met .C.M. mannen, ende willen reisen op die kerstenen te Eggermont, ende wrekent also datmen daer af sal weten te seggen ende si ontbieden u dat ghi al u macht bi een vergaderen sult ende volgen

[p. 328]

hem lieden so geringe als ghi moecht. Die ruese dit horende beet op zijn tanden van quaetheyt, ende vermaledide zijn goden dat si sinen broeder so verradelick hadden laten vermoorden, ende ick sweer bi alle de goden dat ict noch wreken sal datmen daer af sal weten te seggen over .M. iaer. Ende ghi bode reyst weder om tot die heren ende segt dat ic hem binnen drie draghen volgen sal, twelc de bode beloofde also te doen. Die ruese dede zijn scepen bereiden ende alle gereescap maken ende hi vergaderde ontrent .xl. M. mannen om daer mede te reysen na kerstenric. Nu willen wi hier van swijgen ende beginnen weder op Malegijs.

Doen Malegijs zijn penitencie gedaen had die hem vanden paus in geset was alsoe voorseyt is so is hi wt die bosschagie na huys gereyst. Ende Oriande verlangde seer na Malegijs want si hem in .vij. iaren niet gesien en had, dies gelic so verlangde Spiet de sone van Spiet die verslagen was, ende is bi Oriande gecomen om te vernemen waer Malegijs was. Als si bi malcanderen stonden ende spraken van Malegijs, so is Aymijn gecomen binnen Rootsefluer bi hem lieden ende seyde. Oriande sijt verblijt want die tijt is om gecomen van mijns ooms penitencie. Aldus weet ic wel dat hi hier corts sijn sal, dies Oriande ende Spiet seer verblijt waren, ende zijn gegaen ter salen om goede chier te maken. Ter wilen dat si over tafel saten, so had hem Malegijs vercleet na sinen staet ende hi had die heremijts habiten achter gelaten ende is te Rootsefluer binnen gecomen, ende is so binnen den paleyse comen daer Oriande sadt met Aymijn ende met ander heeren ende vrouwen. Doen die dienaren hem sagen soe werden si hem kennende ende hebben vriendelic willecome geheeten. De tijdinge quam terstont aen die tafel, ende si zijn al gelic op gesprongen vander tafelen hem vriendelick willecome heetende, ende men ginck daer weder goet

[p. 329]

chiere maken. Ter wilen dat si saten over tafel so seyde Oriande. Malegijs lief blijft doch nu hier ende en reyst nergent, want ghi genoech gewandelt hebt. Malegijs seide. Oriande lief dat en mach niet zijn, ic moet noch een pelgrimagie doen tot sint Iacob in Compostelen, ende dan en sal ick niet meer reysen. Oriande seyde. Na dien dat ghi daer wesen wilt so laet mi mede reysen, twelc Malegijs consenteerde. Ende doen si gegeten ende gedroncken hadden, so is een yegelic in zijnder rusten gegaen.