Historie van Malegijs

Hoe dye coninginne Torele eenen bode seynde aenden coninck van Mombrant.

DOen dye coninghinne vernam dat die coningen also verslagen waren, so beclaechde si seere die doot van haren man coninc Putiblas, ende si seynde terstont eenen bode aenden iongen coninc van Mombrant geheeten Goriant ende screef hem hoe dat coninc Yvorijn van Mombrant zijn broeder vermoort was van Malegijs ende van Aymijn, ende die bode liep na Mombrant. Doe die bode wech was so ontboot die coninginne al haer soudanen, ammiralen, ende ander heeren datse bi haer comen souden. Doen die heeren bi een vergadert waren so seyde die coninginne. Ghi heeren ghi weet wel hoe dat die kerstene hier heymeliken int lant zijn gecomen, ende hebben den coninc mijnen man verradelic vermoort ende verbrant daer hi stont om iusticie te doen over den fellen kersten Malegijs, welcke verraderije wrake roept voor alle onse goden, nu begere ic aen u lieden te weten hoe dat ict beginnen sal om te wreken die scande ende de scade die ons de kerstenen gedaen hebben. Doen seide een ammirael geheeten Faradin. Genadige coninginne mi dunct als dat ghi ontbieden soudet den coninc Goriant van Mombrant hoe dat zijn broeder verslagen is van de kerstenen, ende dat hi hem bereyde ter wraken, ghi sult hem assistencie ende bijstant doen met alle uwer macht. Voort so heeft ons coninc Putiblas noch drie broeders, te weten Gardymant, Gardyfort, ende Morgalin, ende als dese drie gebroeders, weten sullen die doot van haren broeder si sullen hem haesten

[p. 325]

om dat te wreken: ende versamen haer macht om dat te wreken, ende reysen daer dese kerstenen woonachtich zijn, dit selfde seyden alle die heeren. Doen seyde die coninghinne hoe dat si eenen bode aenden coninck Goriant van Mombrant gheseynt had, ende dat zijt voort ontbieden soude dye drie ghebroederen. Ende hier mede is dien raet ghescheyden, ende zijn ghegaen inde sale etende ende drinckende.

Als dye bode ghereden had vier oft vijf daghen so is hy gecomen in die stede van Mombrant, ende hi ghinck ter salen daer die coninck in was ende hi is op zijn knien gevallen, den coninc seer vriendelick gruetende, ende heeft hem den brief ghegeven. Doen hi den brief ghelesen had so was hi seer qualijcken te vreden, ende hy seyde. Ghy heeren hoe sal ick met dese saken leven dat wy ter wraken moghen comen. Daer op die ammirael Iorabin antwoorde ende seyde. Heer coninc mi dunct dat best waer dat ghi al u volc versaemde, ende reysde daer mede om wrake te nemen vander confusien die u gedaen is, ende ontbieden die drie ghebroeders vanden coninc Putiblas, ende als si dit hooren so sullen si terstont ghewillich zijn om u te helpen ende te comen ter wraken van haren broeder ende ontbiet dye coninghinne Torele dat si u seynde te hulpe .v. M. ghewapende mannen. Dien raet dochte den coninc seer goet, ende hi seide. Ghi heeren oft ick die vaert aen neme suldy my elck bi staen. Daer op si alle gader antwoorden ende seyden. Heer coninc wat u over gaet dat sal ons over gaen, ende wi en sullen u in gheenen noode af gaen. Als dye coninc dit hoorde was hi seer blide, ende hi beval den bode dat hi die coninginne Torele seggen soude, dat si vergaderen soude al tvolc dat si crijgen mochte, ende seyndent my om ons heyr al bi een te hebben, dan sal ic terstont in kerstenrijcke varen sonder eenich beyden, ende

[p. 326]

doen daer alsulcken wrake datmen daer af sal weten te seggen, ende die bode is gereyst na die coninginne ende heeft haer die tijdinghe overgebracht. Ende die coninck ghinc in die sale met zijn heeren, ende hi beval den ammirael Iorabin dat hi die schepen met alle ghereetschap ter oorlogen dienende bereet maken soude om daer mede over te reysen.

Nu willen wi scrijven vanden iongelinck Aymijn die van Malegijs schiet die hem veel costelicker iuweelen ghegheven hadde, sy waren wel weerdich een half lantscap, van ghesteenten van gouden iuweelen die hi gevonden hadde in die duwiere vanden draken. Aldus nam Aymijn oorlof aen zijnen oom Malegijs, hem danckende vander giften die hi hem ghegeven hadde, ende hi wilde reysen na Dordoene. Doen seyde Malegijs. Neve ick bid u dat ghi alle mijn vrienden ende maghen seer doet grueten, ende segt hem dat icse cortelinghe sal comen besoecken waerder noch een cleyn termijn gepasseert dan sal mijn penitencie volbracht zijn. Ende doen scheyde hi van daer, ende is gereyst na Dordoene. Ende als hy te Dordoene binnen quam, so hebben si hem festelic willecome geheeten gelic haren landtshere also hi was, ende zijn ten hove gegaen goede chier makende, ende daer thoonde hi de iuweelen die hem Malegijs ghegeven hadde, ende een iegelick verwonderde van dye costelicheyt der iuweelen, ende doen si ghegeten ende gedroncken hadden ende wel vrolick hadden gheweest, so ghinck een yeghelick slapen.