Hoe dat Ioram dye Castelyn quam totten hertoge ende sey hem hoe dat
zijn ionge kinderen wechgenomen waren.
DOen si dus in rade stonden, so quam daer gheloopen Ioram die casteleyn ende hy
seyde. Edel hertoge u si geclaecht tverlies ende scade die ons ghedaen is van
den heydenen, want ons casteel is geraseert ende verdorven metten brande, ende
IJsane u wijfs suster wechghevoert in heydenisse daert hemlieden belieft, ende
beyde u kinderen zijn wech ghenomen, ende u vrouwe en weet van drucke wat
bedriven. Die hertoghe dit hoorende was qualick te vreden van tverlies van sinen
kinderen, om datse noch ongedoopt waren, ende hi seyde. O God ic mach wel clagen
dat ic mijn kinderen also verloren heb ende mijns wijfs suster IJsane, al heb ic
victorie gehadt tegen die Sarasinen nu heb ic wederom ongeluc dat ic nu verloren
heb [mijn] kinderen, ic en weet van druc wat beginnen. Als dye heren dit
hoorden, so seyden sy. O edel hertoge zijt te vreden, want wat den heere belieft
dat moet gescien, u kinderen sullen wel bewaert zijn want God salse wel bewaren,
ende aldus troosten die heeren den hertoge, also si best mochten.
Auteursrecht onbekend