Den lust-hof van Rethorica

Waer inne verhael ghedaen wordt, vande beschrijvinghen ende t’samen-comsten der Hollantscher Cameren vanden Reden-rijckers, binnen Leyden gheschiedt, den 26 Mey, des Iaers 1596. ende de volgende daghen, met het gene aldaer ghedaen, ende verhandelt is

[p. 56]

Prologvs.
Rethorica Ontfangt de Cameren.

Noyt blyder dach, noyt vrolicker van geest,
Ick mijn dagen des levens en hebbe geweest,
Dan nu, om dat ick in mijn presentie,
Mijn Discipels aenschou, die nu vereeren mijn feest,
Die so lange jaren onder t'Cruys saten bevreest,
Deur der Tyrannen gewelt, die welck met violentie
Mij wilde heel uyt roeden, maer deur patientie
Heb ick haer verwonnen, en ben gecomen in mijn eersten staet,
Deur hulp mijns overicheyts, dien ick bewijs reuerentie,
Als Graeff Maurits, Staten des Lands, en mijn Magistraet.
Want dit gewracht is alleen door haerder daet,
Die ick schuldich ben altoos te obedieren,
Dus heet ick v O Broeders (deur haeren raet,)
Hertelic wellecom, als Broeders met eeren,
t'Gaet wel als Broeders t'samen accordeeren.