Dat. LXVIIJ. capittel.
TER wijlen dat heyndrick /etsijtes/ ende margrieta waren in rusten so troude die grave van viertuyt europa van melanen. ende si droech een kijnt als si van heyndric van lymborch schiet Dese verrader was wt by nachte ende bi daghe om dit kijnt te bederven. ende hi seyde totten heeren dat een overwonnen hoeren kijnt was ende een bastaert. ende hi woudt verbernen in een vier. Daer die heren des lants op antwoorden ende seyden. dat waer onrechte. die vader licht dien gewonnen heeft is van edelen gheslachte ghedescendeert. ende si en woudens niet gedooghen dat ment kint so verbarnen soude. ende die somighe van sijnder afcomste ende gheslachte die wildent hebben. Ende die moeder europa seide doot mi. mer mijn kint niet. waer die vader hier dien wan. ghi soudet u wel ontsien alsulck werck te doen als ghi nu doen wilt. ende u nydicheit thonen aen een onnosel bloet Die heren die dit hoorden haer aen gaende vanden lande en warens ooc niet wel te vreden. ende die van sinen gheslachte waren wildent met hem gedaen hebben. also datter om rees eenen groten twist. Doen wasser een out bedaecht man. een overste van melanen die seide. men zal nemen. XL. daghen wt stellens deser saken aen gaende. ende ghi grave van viertuyt heere van melanen ghi sult u verbinden te wachten eenen campioen die voor dit kint vechten sal in een crijt. ende hem verantwoorden vander saken die ghi hem aen legt. als dat gheen overwonnen bastaert en is, mer een edelmans kijnt. Daer op so antwoorde die grave van viertuyt ende hi seyde. dats mi een cleyn sake. ic wil dat verantwoorden ende doen blijcken dat overwonnen is. mer wie salt verantwoorden. Doen seyde die moeder. het is misseliken wiet verantwoorden sal. die hier licht bi aventueren gheraken sullen ghelijc die ridder heyndric van lymborch. die mi verantwoorde teghens mijnen oom. ende mi vertrooste
Auteursrecht onbekend