Den Bybel met groter neersticheyt ghecorrigeert (Liesveltbijbel 1542)

¶ Hoe dat die beeste op clam vander zee met seuen hoofden, ende met thien croonen, ende thien hoornen, welcke blasphemeerden den naem Gods, ende vander ander beesten hebbende twee hoornen ghelijc een lam.

Dat .xiij. Capittel.

¶ Die derthiende Figuere.

[afbeelding]

1

⁺ENde ic sach een beest wter zee opcomen, hebbende seuen hoofden ende .x. hoornen, ende op sijn hoornen .x. croonen, ende op zijn hoofden namen der lasteringen.

+ A vers 1

2

Ende die beeste die ic sach was gelijc een lupaert, ende zijn voeten als Beyren voeten, ende sinen mont als eenen leeuwen mont, Ende dyen draec gaf hem sijn cracht ende sinen stoel ende grote macht,

3

Ende ic sach een van sinen hoofden als dootlic gewont, ende sijn dootlijcke wonde is genesen, Ende dat heel aertrijc heeft hem verwondert dier beesten,

4

ende hebben den draec aengebeden die der beesten die macht heuet gegeuen, ende baden die beest aen, seggende, Wie is der beesten ghelijc, ende wie can met haer vechten?

5

Ende haer wort eenen mont gegeuen, grote dingen, ende blasphemien te spreken, ende haer wort macht gegeuen xlij maenden lanc te doen.

6

⁺Ende sy dede haren mont op, ter lachteringe tegen God, om sinen naem te blasphemeren, ende sinen tabernakel, ende die inden hemel wonen

+ B vers 6

7

ende hem wordt ghegeuen te oorlogen metten heyligen, ende te verwinnen Ende hem wort macht gegeuen ouer alle geslachten ende tongen ende heydenen,

8

ende alle die opter aerden wonen aenbadense, der welcker namen niet in dat leuende boec des lams, ghescreuen en sijn dat ghedoot is van begin der werelt

9

Heuet yemant ooren die hoore,

10

Die in de geuanckenisse leyt die gaet in die geuanckenisse, die metten sweerde doodet, die moet metten sweerde gedoot worden, Hier is die verduldicheyt ende dat gheloue der heyligher.

11

Ende ic sach een ander beest opclimmende vander aerden, ende hadde twee hoornen gelijc den lam, ende sprac ghelijc als den draeck,

12

ende het doet al die macht der eerster beesten in sijn tegenwoordicheit, ende het doet die aerde, ende die daer op woonen die eerste beeste aenbeden, der welcker dootlike wonde genesen was,

13

ende heeft groote teekenen gedaen, also dat ooc vier vanden hemel doet comen, op die aerde, in die tegenwoordicheit der menschen,

14

ende verleyt die ghene die op dye aerde woonen, om dier teekenen wille die hem gegeuen zijn te doen inde tegenwoor-

[p. *]

dicheyt der beesten, seggende totten genen die op die aerde wonen, dat si der beesten een beelt souden maken, die de wonde des sweerts heeft, ⁺ ende leuende geworden was

+ D vers 14

15

Ende hem wert gegeuen dat den beelde der beesten den geest gaf, ende dat dat beelt der beesten spreken soude, ende dattet doen soude, dat alle die gene die der beesten beelt niet en aenbaden, gedoodet souden worden,

16

Ende het doet alle cleyne ende groote, rijcke ende arme, vrye ende knechten een teeken in hare rechte hant oft in hare voorhoofden hebben, ende dat nyemant coopen, oft vercoopen en machhet

17

en si dat hi dat teeken oft den naem der beesten oft dat getal haerder namen hebbe.

18

Hier is wijsheyt, Die verstant heeft die ouerlegge dat ghetal der beesten, want het is eens menschen ghetal, ende sijn getal is ses hondert ende sessensestich.