Den Bybel met groter neersticheyt ghecorrigeert (Liesveltbijbel 1542)

Die Apostel bewijst ons quaet dat wter tongen spruyt, also wel in leeringe als int ghemeyn leuen onderscydende die leeringe Gods ende der werelt.

Dat .iij. Capittel.

1

⁺MIne lieue broeders, en onderwint v niet alle leeraers te sine, ende weet dat ghi ontfanct te meerder oordeel, want wi sondigen altemael vele,

+ A vers 1

2

wie inden woorden niet en sondicht, die is een volcomen man, ende can ooc dat gheheele lichaem inden thoom houden.

3

Siet dye peerden houden wi inden toom, om ons gehoorsaem te sine, ende buygen al haer lichaem.

4

Ende siet die scepen, hoe wel dat si groot sijn, si werden gedreuen vanden stercken winde, ende werden omgeuoert van eenen cleynen roeder, waer die stierman wilt,

5

⁺Also is die tonghe een cleyn lidt, ende bescict grote dingen. Siet ooc hoe cleynen vier so groten wout oft bossche ontsteket?

+ B vers 5

6

Ende die tonge is ooc een vier, een werelt vol ongerechticheyts, also is dye tonge onder onse leden, ende si beulect dat gheheel lichaem, ende si ontfanct alle onse wandelinge, als si ontsteken is vander hellen.

7

Want alle natuere der dieren ende der vogelen ende der slangen ende der dieren vander zee, die werden gedwongen, ⁺ ende sijn ghetemt vander menscheliker natueren.

+ C vers 7

8

Mer die tonge der menschen en mach nyemant temmen, het is een ongerustich quaet, vol vergiffelicx venijns.

9

Metter tongen gebenedijen wi God den vader, ende metter tongen veruloecken wy dye menschen dye gescapen sijn totten beelde Gods,

10

Wt den seluen monde gaet wt die benedijnge ende maledijnge. Mijn lieue broeders, ten soude also niet zijn.

11

Vloeyt ooc wt die fon-teynen wt eenen gate, soet ende bitter water?

12

Lieue broeders, mach ooc die vijchboom olie, ende den wijngaert vijgen dragen? Also en can wt een fonteyne niedt sout ende soet water loopen.

13

⁺Wie onder v wijs is wel ghesticht is, die thoone sijn wercken wt goeder wandelinghen inder saechtmoedicheyt der wijsheyt.

+ D vers 13

14

† Mer hebt ghi bitteren nijt ende tweedracht in uwer herten, so en beroemt v niedt, ende en liecht nyet tegen die waerheyt,

15

want dese wijsheit die en is niet van bouen neder gedaelt, maer si is eertsch vleeschelic ende duuels,

16

want waer nijt ende twist is, daer is ongestadicheyt, ende alle quaet werc,

17

mer die wijsheit van bouen, is ten eersten reyn, daer na vreedsaem, ghesatich, gesegelic, stadich, vol ontfermherticheyts, ende goeder vruchten, sonder partije, sonder geueynstheyt

18

Mer die vrucht der gerechticheyt, wert in vreden gesaeyt, den ghenen dye den vrede houden.