Den Bybel met groter neersticheyt ghecorrigeert (Liesveltbijbel 1542)

Die apostel verwect ons altijt duecht te doene onsen naesten, oft onsen prelaten, ende begeert dat si voor hem bidden sullen.

Dat .xiij. Capittel

1

⁺BRoederlike liefde laet blijuen, Ende en vergeet nyet gastvry te sijn,

+ A vers 1

2

want door dat selue hebben sommige sonder haer weten Engelen geherbercht,

3

Gedenct der gebonden als die medeghebonden, ende der geender die ongemac lijden, als ghi die ooc selue inden lichaem sijt.

4

Eerlic si dat houwelic ende dat bedde onbeulect, God sal dye hoereerders ende dye ouerspeelders ordelen,

5

Die wandelinghen sullen sonder giericheyt sijn, ende laet v genoegen metten ghenen dat daer is Want hi geseyt heeft, Ic en wil v niet laten noch versumen, also dat wi derren seggen,

6

Die HERE is mijn hulper, ende ic en wil mi niet vreesen, wat mi een mensche doen sal.

7

Gedenct uwer voorgangers die v dat woort Gods geseyt hebben, der welcker wtganc aensiet, ⁺ ende volcht haer gelooue na.

+ B vers 7

8

Iesus Cristus ^a gisteren ende heden, ende hi oock inder eewicheyt. *

a Gisteren ende heden wordt hier geset voor altijt. Io. xx f

9

En laet v niet met menigerley ende vreemde leeringen verleyden. Want het is goet door die genade dat herte te beuestigen, niet met spijsen, door welcke si geen nutscap en hebben ontfangen, die daer in gewandelt hebben,

10

Wy hebben eenen outaer, daer af gheen macht en hebben te eten, die den tabernacule dienen,

11

want welcker dieren bloet, door den oppersten priester gedragen wort in dat heylige voor die sonden der seluer lichamen werden verbrant buyten den heyrleger.

12

Waerom Iesus ooc, om dat hi dat volck soude heyligen door sijn eygen bloet, heeft hy geleden buyten voor die poorte.

13

Daerom so laet ons nv tot hem wtgaen buyten den leger, ende sijn versmaetheyt dragen,

14

want wi en hebben hier geen bliuende stadt, mer wi soecken die toecomende.

15

⁺Daerom so laet ons nv door hem offeren die ^b offerhande des loofs Gode altijt, dat is die vrucht der lippen der geender die sinen naem bekennen

+ C vers 15

b Offerhande des loues, is den naem Goods louen, niet alleene metten monde, mer ooc door de wercken des geloofs. Psal. xlix.

16

Mer der weldaet ende des mededeelens en vergeet niet, want met sulcke offerhande versoentmen voor God.

17

† Sijt onderdanich uwe voorganghers, ende doet v onder hen, want si waken ouer v siele, als die rekenscap daer voor gheuen sullen, op dat si dat met vruechden doen ende niet met suchten, want dat en is v niet toedrachgelic.

18

Bidt voor ons.

Wi betrouwen dat wi een goede conscientie hebben in allen dingen, ende wi willen goede wandelinge hebben,

19

Mer ic vermane v dat oueruloedelic te doen, op dat ic opt cortste weder ghebracht werde.

20

⁺God des vreden, die vanden dooden den grooten herdere der scapen, door dat bloet des eewigen testaments ons HEREN Iesu Cristi wtgheleyt heeft,

+ D vers 20

21

die make v bequame in allen goeden wercken, om sinen wille te doen, ende doe v dat hem behagelic is, door Iesum Cristum, den welcken si prijs van eewicheit Amen.

22

Mer ic vermane v lieue broeders, hout dat woort der vermaningen int goet, Want ic heb v opt cortste gescreuen.

23

Kent den broeder Timotheum, den wlecken wi van ons ghelaten hebben, met welcken, ist dat hy vollic coemt, wil ic v sien.

24

Gruet alle uwe voorgangers, ende alle heyligen, Die broeders in Italien grueten v, Die ghenade si met v allen. AMEN.