Den Bybel met groter neersticheyt ghecorrigeert (Liesveltbijbel 1542)

¶ Die Apostel seyt hoe dat wi Christo onderdanich worden door tghelooue, dwelc hi na seer prijst

Dat .xi. Capittel

1

⁺HEt ghelooue is een seker betrouwen des geens dat te hopen is, ende het schict hem na tgene dat niet en schijnt,

+ A vers 1

2

door dat hebben die ouden ghetuygenisse vercregen.

3

Door dat ghelooue mercken wy

[p. *]

dat die werelt gemaect is door dwoordt Gods, op dat die sienlike dingen wt die onsienlike bekent worden

4

Door dat gelooue heeft Abel Gode eenen grooteren offer gedaen dan Chaym, door welcke hi een ghetuyghenisse vercreghen heeft dat hi gerechtich is, als God ouer sijn ghauen getuychde, ende door dat selue spreect hi noch, ⁺ hoe wel hi ghestoruen is.

+ Ge. iij.a

5

Door dat ghelooue wert Enoch wech genomen op dat hi die doot niet sien en soude, ende hi en werdt niet gheuonden, om dat hem God wech nam, Want voor sine wechneminge, heeft hi getuygenisse ghehadt, dat hi Gode behaecht heeft.

6

Want sonder tgelooue ist onmogelijc God te behagen, want wie tot God comen wil, die moet gheloouen dat hi si, ende den ghenen die hem soecken, een betaelder sijn sal

7

⁺Door dat ghelooue heeft Noe God gheeert, ende die arcke bereyt tot salicheyt sijns huys, ⁺ doe hi een Godlic beuel ontfinc, vanden dingen die noch niet ghesien en worden, door welcke Godt die weereldt verdoemt, ende hi is een erfgenaem der gerechticheit geworden, die door dat ghelooue coemt

+ B vers 7

+ Ge. vi.b

8

Door dat gelooue wert gehoorsaem, die daer genaemt is Abraham, wt te gaen in dat landt, dat hy tot een erffenisse soude ontfanghen, ende ghinc wt, ⁺ ende hi en wiste niet waer hi comen soude. ⁺

+ C vers 8

+ Ge. xij.a

9

Door dat gelooue is hi een vreemdelinc geweest in dat beloofde lant, als een vreemde ende woonde in hutten, met Isaac ende Iacob, den medeerfgenamen der selfder beloften,

10

want hi verwachte een stadt dye eenen gront hadde, welcker tymmerman ende schepper God is.

11

Door tgelooue ontfinc Sara ooc cracht, dat si beurucht wert ende baerde ouer den tijt haers ouderdoms, want si achte hem getrouwe diet belooft hadde.

12

Daerom, sijn ooc van eenen (hoe wel gestoruens lichaems) so vele geboren, ⁺ gelijc die sterren aenden hemel, na die menichte, ende gelijc dat sant aen dat oeuer der zee, dat ontellick is

+ D vers 12

13

Alle dese sijn gestoruen na den geloue, ende en hebben die belofte niet ontfanghen, mer si hebbense van verre gesien, ende hen daer op vertroost, ende daer aen gehangen, Ende hebben bekent dat si gasten ende vreemdelingen opter aerden sijn,

14

want die dat segghen, die geuent aen den dage (dat is) si bewijsen dat si een vaderlant soecken,

15

Ende het is waer, hadden si daer op gedacht van welcken si wt waren gegaen, si hadden ymmer tijt wederom te keeren,

16

Mer nv begeerden si eenen beteren daerom en schaemt hem God haerder niedt, haren God te heeten, want hi heeft haer een stadt bereyt.

17

Door dat gelooue offerde Abraham Isaac, doen hy getempteert wert, ⁺ ende gaf daer henen, den eengheborenen, daer hi die belofte in hadde ontfangen,

+ ge. xxij.a

18

van welcken geseyt was. In Isaac sal v dijn saet geheeten worden,

19

ende hi dachte, God can hem wel vanden dooden verwecken, waer wt hi hem ooc tot een ghelijckenisse weder nam.

20

Door dat gelooue gebenedijde Isaac Iacob, ende Esau, vanden toecomenden dingen,

21

Door dat gelooue gebenedijde Iacob, doen hi sterf, beyde Iosephs sonen, ende aenbadt sijns scepters scerpheyt oft roede.

22

Door dat gelooue dede Ioseph die vermaninge vanden wtganc der kinderen van Israhel, doen hy sterf, ⁺ende geboot van sinen ghebeente

+ Gene. xxvij.c.

23

Door dat gelooue wert Moyses drie maenden van sinen ouders verborgen, doe hi geboren was, om dat klagen dat hi een scoon kint was, ende en vreesden des Conincx ghebot niet.

24

Door dat geloue loochende Moyses, doen hi groot was geworden, een sone te heeten, der dochter Pharao,

25

⁺ende vercoos veel lieuer met dat volck Gods ongemac te lijden, dan die tijtlijcke genoechte der sonden te hebben,

+ E vers 25

26

ende achte die versmaetheit Cristi voor groter rijcdom, dan die scatten Egipti, want hi sach op die looninge.

27

Door dat ghelooue liet hi Egipten, ende en ontsach die moedicheyt des Conincx niet, want hi hielt op den onsienliken, also oft hi hem saghe.

28

⁺Door dat gelooue hielt hi den Paesschen, ende die wtstortinge des bloets, ⁺ op dat die ghene dye deerste geboren doode, haer niet en soude raken.

+ F vers 28

+ exo. xij b

29

Door dat gelooue gingen si door die roode zee, als door dat drooge lant, ⁺ dwelc die van Egipten oock versochten ende proefden, mer si verdroncken.

+ exodi xiiij.g

30

Door dat ghelooue vielen die mueren van Iericho, doen si seuen dagen omringt waren.

31

Door dat gelooue en bederf die hoere Raab met den ongeloouigen niet, doen si die verspyers met vreden ontfinck.

32

Ende wat sal ic meer seggen? Den tijt wort mi te cort waert dat ic soude vertellen van Gedeon ende Barac, ende Sampson ende Iephte,

33

ende Dauid, ende † Samuel, ende die Propheten, die de Conincrijcken hebben verwonnen ende gerechticheit gedaen, waer door si die belofte vercregen hebben, der leeuwen monden verstopt,

34

die cracht des viers wtgelescht, des sweerts scerpheit zijn si ontgaen, si sijn crachtich gheworden wt der crancheyt, si sijn sterc geworden inden strijt,

35

si hebben die heyrlegers der vreemder veriaecht. Die vrouwen hebben die hare vander dooden verrijsenisse weder ghenomen.

⁺ Mer die ander sijn wtgespannen, ende en hebben geen verlossinge aengenomen, op dat si die verrisenisse die beter is, vercrighen souden.

+ G vers 35

36

Die ander hebben bespottinge ende geesselen besocht, daer toe banden ende geuanckenissen,

37

si sijn gesteent, verhouwen, getempteert, door slagen des sweerts gestoruen, si hebben om ghegaen in pelsen, ende geyten vellen, met gebrec, met tribulatien, met ongemac,

38

die der werelt niet weerdich en was, ende sijn dolende gegaen in die woestinen, op die bergen in die speluncken oft holen der aerden.

39

Alle dese hebben door dat gelooue getuygenisse vercregen, ende die belofte niet ontfanghen,

40

om dat God wat beters voor ons versien heeft, op dat si niet sonder ons voleyndt en souden werden.