Den Bybel met groter neersticheyt ghecorrigeert (Liesveltbijbel 1542)

Hier wort bethoont Christus priesterschap meerder te sine dan Melchisedechs, oft van den leuiten.

Dat .vij. Capittel.

1

⁺DEse Melchisedech was een Coninck tot Salem, ⁺ een priester des alderhoochsten Gods, die Abraham te gemoete ginc doen hi weder quam vander coningen slach ende gebenedide hem,

+ A vers 1

+ Gene. xiiij.d

2

den welcken Abraham ooc thiende van alle sijn goeden gaf. Ten eersten wort hi bediet een Coninc der gerechticheit, daer nae is hy ooc een Coninc Salem, dat is, een coninck des vreedts,

3

sonder vader, sonder moeder, sonder geslachte, ende hi en heeft noch beghin der dagen, noch eynde des leuens, mer hi is den sone Gods gelijc, ende hi blijuet priester inder eewicheyt

4

Aensiet, hoedanich die ghene is dien oock Abraham die Patriarch thiende vander geroofder buete geuet,

5

⁺Tis waer, die kinderen Leui als si dat priesterdom onfangen, so hebben si een gebot, die thiende vanden volcke te nemen, na die wet, dat is van haren broederen, hoe wel die ooc wten lendenen Abrahe gecomen sijn,

+ B vers 5

6

Mer die, des welcx geslacht onder hen nyet ghenoemt en wert, die nam thiende van Abraham, ende gebenedide den genen die de belofte hadde.

7

Nv ist sonder alle wederspreken also, dattet ghene dat het minste is, vanden beteren gebenedijt wort,

8

Ende hier nemen de sterflike menschen thiende, mer daer getuycht hi dat hi leuet.

9

Ende op dat ic also spreke, het is ooc Leui die dye thiende

[p. *]

neemt, door Abraham verthient,

10

Want hi was ymmer noch inden lendenen sijns vaders, doen hem Melchisedech teghen ghinc.

11

Is dan die veruullinge door dat Leuijtsche priesterdom ghesciet (want onder dyen seluen hadde dat volc die wet ontfangen) wat ist dan van noode, datter een ander priester op come na die ordine Melchizedech, ende niet na die ordinantie Aaron?

12

Want waer dat priesterdom verandert wort, daer ist van noode dat die wet ooc verandert worde.

13

Want daer dat af geseyt is, die is van anderen gheslachte, wt welcken noyt geene des outaers ghepleecht en heeft.

14

Want het is voor int openbaer, dat onse HERE van Iuda op gegaen is, tot welcken geslacht Moyses niet gesproken en heeft vanden Priesterdom.

15

Ende het is noch claerder, ist dat nader ordinancie Melchisedech, een ander priester opcoemt, die nyet na die wet des vleesceliken gebots gemaect is, ⁺ mer na die cracht des oneyndelijcken leuens,

+ C vers 15

16

Want ghi getuyget. Ghi sijt een priester inder eewicheyt, nae dye ordineringe Melchisedech,

17

Want daer mede gesciet een wechneminge der voorgaender wet, om haerder crancheyt ende onprofitelicheyt wille

18

(Want die wet en heeft niet volmaect) mer si was een volbringhinghe eens hoops, door welcke wi God ghenaken.

19

So isser ooc eenen eedt gesworen. Die ghene sijn sonder eedt priesters geworden,

20

mer dese met den eedt door den genen die tot hem spreect, Die HERE heeft gesworen, ende ten sal hem niedt berouwen, ghi sijt een priester inder eewicheyt, na die oordinantie Melchisedech.

21

Also vele is Ihesus eens beters testaments wtreycker geworden.

22

Ende der gheender sijn vele die priesters worden, om dat hem die doot belet te blijuen,

23

⁺maer dese, om dat hi eewelic een blijft, soo heeft hi een onuerganckelic priesterdom,

+ D vers 23

24

waer wt hi ooc salich maken mach eewelic, die door hem tot God comen, ende leuet altijt om ons te verbidden

25

Want ons betaemt alsulcken hoogen priester een te hebben, die daer heylich, onsculdich, onbeulect, verre vanden sondaren, of afgesceyden, ende die hooger geworden is dan die hemelen,

26

den welcken niet dagelicx van noode en si, gelijc den anderen hoogen priesters, ten eersten voor sijn eygen sonde offerhande te doen, daer na voor des volcx sonde, Want dat heeft hi gedaen, doen hy hemseluen eens offerde,

27

Want die wet set menschen tot hoogen priesteren, die daer crancheyt hebben, mer dat woort des eedts dat na die wet geseyt is, dat sedt den soon eewelic volcomen.