Den Bybel met groter neersticheyt ghecorrigeert (Liesveltbijbel 1542)

¶ Die Apostel leert hier wie dat sijn leeringhe bequaem is oft onbequaem.

Dat .vi. Capittel

1

⁺DAerom laet ons die leeringe vanden beginne des Cristelicx leuens onder wegen laten, ende laet ons totter volcomenheyt varen,

+ A vers 1

2

niet weder gront oft fundament leggende, der boeten der doder wercken, ende des geloofs aen God,

3

der doopinghen, der leeringen, der hant oplegginge, der verrijsenisse der dooden, ende des eewigen ordeels,

4

Ende dat willen wi doen ist dat God anders toelaet,

5

Want het is onmogelic dat die ghene, die eens verlicht sijn, ende die hemel-sche gauen gesmaect hebben, ende des heylichs geests deelachtich geworden sijn, ende hebben dat goede woort Gods gesmaect, ende die cracht der toecomender werelt,

6

ist dat si ontuallen, dat si wederom vernieut souden werden, tot penitencie of boete, die den sone Gods haer seluen weder cruycen ende voor spot hebben.

7

⁺Want die aerde die den reghen drinct, die dicwil op haer coemt, ende bequaem cruyt den ghenen draecht, diese bouwet, die ontfangt benedijnge van God,

+ B vers 7

8

Mer die doornen ende dijstelen die sijn onduchtich of verworpen ende seer bi der vermaledijdinge, welcx eynde reyct totter verberninge,

9

Mer wi betrouwen ons ghi alderliefste, beters tot v, ende dat die salicheyt naerder si, hoe wel wi so spreken.

10

Want god en is niet ongerechtich, also dat hi vergete ws wercx, ende ws arbeyts der liefden, die ghi bewesen hebt aen sinen naem, doen ghy den heyligen diende, ende noch dient.

11

⁺Mer wi begeeren dat een yegelic van v, die selue neersticheyt bewijse op dat den hope vol werde tot aent eynde,

+ C vers 11

12

op dat ghy niet luy en wert, mer dat ghi di na volget, die door tgelooue ende lancmoedicheyt die belofte beeruen.

13

Want als God Abrahe geloofde, ⁺ doen hi bi geenen grooteren te sweren en hadde, so swoer hi bi hem seluen seggende.

+ ge. xxij c

14

Waerlic, ic wil v ghebenedien ende vermeerderen,

15

ende also bleef hi lancmoedich, ende heeft dye belofte vercreghen.

16

Die menschen sweeren bi eenen groteren dan si sijn, ende dien eedt is dat eynde alles kiuens totter beuestinge onder haer.

17

⁺Mer doen God den erfgenaem der beloften oueruloedich woude bewijsen, op dat sinen raet niet en soude wanckelen, heeft hi daer eenen eedt tusschen ghesedt,

+ D vers 17

18

op dat wi tusscen twee onwanckelike dingen (waer door dat ommoghelick is dat God liegen soude) eenen stercken troost hebben dye hier toe geulucht zijn, om te houden aender voorgesetter hopen,

19

die welcke wi als eenen sekeren ende vasten ancker onser sielen hebben, die ooc in gaet in dat binnenste des voorhangs daer die voorlooper voor ons is ingegaen, Iesus, een ouerste priester geworden inder eewicheyt, nader ordinantie Melchisedech.