Den Bybel met groter neersticheyt ghecorrigeert (Liesveltbijbel 1542)

Hier beghint die anderde Epistel van sinte Peter.

¶ Die Apostel vermaent den geloouigen dat si sterckelijc houden ende bescermen sullen die warachticheyt des geloofs, ende dat met sekerheyt der propheten.

Dat .I. Capittel

1

⁺SYmon Petrus een knecht ende Apostel Iesu Christi.

Dien die met ons gelijcke gelooue gecregen hebben in die rechtueerdicheyt Gods, ende den salichmaker Iesus christus

+ A vers 1

2

Genade ende vrede si met v, door die kennisse Gods ende Iesu Christi ons HEEREN.

3

Nae dat alderley sijnre Godlicker cracht (al wat ons dient totten leuen, ende den Goddelijcken wandelingen) ons ghegeuen is, door die kennisse diens, dye ons geroepen heeft door sijn glorie ende crachte,

4

door welcken ons die costelijcsten ende grootsten beloften ghegeuen sijn, also dat ghi door dat selfde mede erfgenaem wert der Godlijcker natueren, ist dat ghi vliet die verganckelijcke wellust deser werelt.

5

So doet al v neersticheyt daer toe, dat ghi in uwen gelooue bewijst die duechde, ⁺ inder duechden bescheydenheyt,

+ B vers 5

6

inder bescheydenheyt maticheit, inder maticheyt lijdtsaemheyt, inder lijdtsaemheit Godsalicheyt,

7

inder Godsalicheyt broederlijcke liefde, inder broederlijcke liefde gemeyn liefde,

8

Ist dat dese dingen oueruloedelijc bi v sijn, so en sullen si v niet ledich noch onuruchtbaer laten wesen in die kennisse ons HEREN Iesu Christi,

9

Mer die dese dingen niet bi hem en heeft, die is blint, ende tast metterhant, ende vergetet die reyninge sijnre voorledender sonden.

10

Daerom lieue broeders, doet des te meer neersticheyt om v roepinge ende verkiesinge vast te maken. Ist dat ghi dat doet, so en sult ghi niet vallen,

11

ende alsoo sal v oueruloedelijc bereyt werden den inganc totten eewigen rijc ons HEREN Iesu Christi ons salichmakers.

12

Daeromme so en wil ic niet versuymen, v altijt te vermanen, ⁺ hoe wel dat ghijt weet, ende gesterct sijt in der tegenwoordiger waerheyt.

+ C vers 12

13

Want ic achtet profijtelic te wesen, dat so lange ic in desen lichaem ben, v te verwecken ende te vermanen,

14

want ic weet dat ic mij-nen lichaem corts afleggen moet, als mi dat die HERE Iesus Christus geopenbaert heeft,

15

Maer ick wil neersticheyt doen, dat ghi altijt na mijn afsceyden sulcx in uwer ghedachten hebben moecht.

16

Want wi en sijn niet geuolcht den cloecken fabulen, als wi v vercondicht hebben die cracht ende toecoemste ons HEREN Iesu Cristi, mer wi sijn aenscouwers geweest sijnre maiesteyt,

17

doen hi van God den vader ontfinc eere ende glorie, door een stemme die tot hem geschiede vander hoochwaerdiger glorien, aldus. Dit is mijn lieue sone, in welcken ic een goet behaghen hebbe,

18

Ende dese stemme hebben wi ooc gehoort vanden hemel ghebrocht, doen wi met hem waren op den heyligen berge

19

Wi hebben een vast Propheets woort, ⁺ ende ghy doet wel dat ghi daer op acht, als op een licht, dat welc daer schijnt in eenen donckeren hoec, ter tijt toe dat den dach aen coemt, ende die morgensterre op gae in uwer herten.

+ D vers 19

20

Ende dit sult ghi voor dat eerste weten dat geen prophecie der scrift en gesciet wt eyghender wtlegginghe,

21

Want ten is noyt prophecie wt menschelijcken wille voortgebracht, mer die heylighe menschen Gods hebben gesproken, als ghedreuen vanden heyligen gheest.