Den Bybel met groter neersticheyt ghecorrigeert (Liesveltbijbel 1542)

¶ Die Apostel leert die gene die pastoors sijn oft die inden staet der ioncheyt sijn, ende dat tot ootmoedicheyt, ende tot soberheydt

Dat .v. Capittel

1

⁺DIe ouden die onder v sijn, vermane ick die daer mede onder een getuych ben der lijdenen die in Cristo sijn ende ooc mede deelachtich der glorien, die geopenbaert sal worden

+ A vers 1

2

Weydet die cudde Christi, die onder v is, ende voorsietse, niet wt bedwanc, mer willichlijc, niet om onbehoorlijcken profijts, willen, mer wt een toegeneycht gemoede,

3

niet als die gene dye daer dommeren ouer dat erffenisse, mer weest een exempel der cudden, ⁺

+ Ia. iiij.c

4

⁺So sult ghi (als hem openbaren sal die ouerste herder) ontfangen die onwerwelckelike croone.

+ B vers 4

5

Desgelijcken ghi iongen, weest onderdanich den ouden alte samen, een yeghelijck si den anderen onderdanich, ende toont daer in v ootmoedicheit, want God wederstaet den hooueerdigen, mer den oomoedi-

[p. *]

ghen gheeft hi gracie.

6

† Daerom verootmoedicht v nv onder die crachtige hant Gods, op dat hi v verheffe tot sijnder tijt,

7

⁺al v sorghe worpt op hem, want hi sorghet voor v.

+ C vers 7

8

Weest nuchteren ende waect, want v wederpartije die duyuel, gaet rontsomme, als een grimmende leeuwe, ende soect welcken dat hi verslinden mach,

9

Dien wederstaet sterckelic int ghelooue, wetende dat uwe broederscap dat selue lijden ghesciet dat in die werelt is.

10

Mer die God alre genaden, die v geroepen heeft, tot sijnder eewiger glorien in Christo Iesu, ⁺ die sal v, ghi die een cleyn tijt lanc lijdet, volmaect maken, stercken, becrachtighen, ende beuestighen,

+ D vers 10

11

Den seluen si glorie, ende macht van eewicheyt tot eewicheyt Amen. *

12

Door uwen getrouwen broeder Siluanum (als ic vermoede) heb ic v een weynich ghescreuen, vermanende ende betuygende, dat die rechte ghenade Gods is, daer ghi in staet.

13

Het groet v die vergaderinge die te Babilonien is, ende mijn soon Marcus,

14

Groet malcanderen met eenen cusse der liefden. Vrede si met v allen die in Christo Iesu sijn Amen.