Den Bybel met groter neersticheyt ghecorrigeert (Liesveltbijbel 1542)

Hier beghint die eerste Epistel van sinte Peeter

¶ Petrus wort bedanct van die vernyeuwinghen des doopsels

Dat eerste Capittel

[afbeelding]

1

⁺PEtrus een Apostel Iesu Christi.

Den wtuercoren vreemden, hier ende daer in Ponto, Galacia, Capadocia, Asia, ende Bitinia,

+ A vers 1

2

na der voorsieninge gods des vaders, in die heylichmakinghe des geests, tot der gehoorsaemheyt, ende die besprenginge des bloets Iesu Christi.

Ghenade ende vrede meerdere hem bi v.

3

Gebenedijt si God ende die vader ons HEREN Iesu Christi, die ons na zijnre grooter barmherticheyt heeft weder ghebaert, tot een ^a leuende hope, door die verrijsenisse Iesu Cristi vanden doden

a Leuende hope, is die hope door welcke wi seker sijn des eewichs leuens.

4

tot een onuerganckelic ende onbeulect, ende onuerwelckelike erffenisse, die daer is behouden inden hemel op v,

5

ghi die

[p. *]

door die cracht Gods int ghelooue bewaert werdet totter salicheyt, welcke bereyt is, dat si ontdect werde ter laetster tijt,

6

in welcken ghi v verblijden sult, ghi die nv eenen cleynen tijt lanc (so dat sijn soude) bedroeft sijn in menigerley temptacien,

7

op dat die beproeuinghe aen uwen ghelooue, veel costelijcker gheuonden werde dan dat verganckelike gout, welc door dat vier ondersocht wort, te loue ende prijs ende eere, wanneer nv operbaer wert Iesus Christus,

8

welcken ghi noyt gesien, ⁺ nochtans bemint hebt, in welcken ghi oock ghelooft, ende noch niet en siet, om des gheloofs wille sult ghi v verblijden met onsprekeliker ende heerlijcker blijschappen,

+ B vers 8

9

ende dat eynde ws gheloofs daer af brengen, welc is der sielen salicheyt.

10

Na welcker salicheyt hebben ghesocht ende ondersocht die propheten, die vander toecomender genaden op v ghepropheteert hebben,

11

ende hebben ondersocht op welcken ende hoedanigen tijt dat die gheest Christi beteekenende, die in haer was, ende te voren getuycht hadde die lieden die in Christo sijn, ende die heerlicheyt daer na, welcken dat gheopenbaert is,

12

Want si en hebbent haer seluen niet mer ons gedaen, welcke v nv vercondicht wort, door den heylighen gheest vanden hemel gesonden, in welcken ooc die engelen lusten te sien.

13

⁺Daerom so ^a begordet die lendenen ws ghemoets, weest nuchteren, ende settet heel ende alle v hope, op die ghenade die v aengeboden wort door die openbaringe Iesu Christi,

+ C vers 13

a Lendenen begort hebben, is sterc wesen om alle tribulatien te lijden eph. vi c

14

als kinderen des gehoorsaemheyts, niet nauolgende die voorleden wellusten uwer onwetentheit,

15

mer na dyen, die v geroepen heeft, ende heylich is, weest ooc heilich in al uwe wandelinghe

16

na dattet gescreuen staet. Ghi sult heylich wesen, want ic heilich ben.

17

Ende ist dat ghi dien tot eenen vader aenroept, ⁺ die sonder aensien der persoonen oordeelt na eens yegeliken werck, soo ouerbrengt uwe conuersacie, dye tijt uwer pelgrimagien met vreese.

+ D vers 17

18

† Ende weet dat ghi niet met verganckeliken siluer oft gout verlost en sijt, van uwe ydele wandelinge, in uwer vaderlijcker insettinghe,

19

mer met den dierbaren bloede Christi, als eens onschuldigen, ende onbeulecten lams,

20

die te voren voorsien is voor der werelt beghinsel, mer gheopenbaert totten laetsten tijden om uwen wille,

21

ghi die door hem gelooft aen God, die hem op verwect heeft vanden dooden, ende hem die glorie heeft ghegeuen, op dat ghi gelooue ende hoope tot God hebben muecht.

22

Ende maect reyn v sielen door die ghehoorsaemheyt der waerheyt inden gheest, tot rechter ongeueynsder broederliker liefden, ende hebt v onder malcanderen hertelic lief wt reynder herten,

23

als die weder gheboren sijn niet wt verganckeliken, mer wt onuerganckeliken sade, als wt dat leuendighe woort Gods, dat daer eewelijck blijft.

24

Want alle vleesch is als een gras, ende alle heerlicheyt des menschen, als een bloeme des gras. Dat gras is verdorret, ende die bloem is afgeuallen,

25

mer dat woort des HEREN blijft inder eewicheit, dat is dat dwoort dwelc door dat euangelium tot v ouergebracht is. *