Den Bybel met groter neersticheyt ghecorrigeert (Liesveltbijbel 1542)

Hier beghint dye Epistel Pauli tot Philemonem.

¶ Die Apostel bidt Philemonem dat hy Onesimum weder ontfanghen wil, hem groetende.

Dat eerste Capittel.

1

⁺PAulus dye gheuangen Iesu Cristi, ende die broeder Timotheus.

Den gheminden Philemoni onsen medehulpere,

+ A vers 1

2

ende Aphie der liefster sustere, ende Archippo onsen medestrijder, ende al die vergaderinge dye in uwen huyse is.

3

Ghenade ende vrede van God onsen vader, ende den HERE Iesu Christo.

4

⁺Ic dancke mijnen God, ende ghedencke altijt uwer in mijn bedinghen,

+ B vers 4

5

hoorende v liefde, ende tgeloue dat ghi totten HERE Iesum Christum, ende alle heyligen hebt,

6

dat ons gemeyn gelooue in v lieden crachtich werde, door kennisse van alle goeden, dat in v is in Christum Iesum.

7

Ic heb groote blijschap, ende troost in uwer liefden, want die heylighen sijn door v hertelick vermaect oft vertroost lieue broeder.

8

Lieue broeder, al heb ic die vryheit in Christo Iesu, v te ghebieden totten dinghen die v toebehooren,

9

nochtans om der liefden wille bid ick v lieuer, om dat ic alsulc ben, namelic eenen ouden Paulus, ende nv ooc gheuangen Iesu Christi,

10

⁺So vermane ic v om mijns soons wille Onesimo, dyen ic inder geuanckenissen ghebaert hebbe,

+ C vers 10

11

die v voortijts onnutte was, maer nv is hi mi ende v orbaerlic,

12

dien heb ic weder ghesonden, Ontfanct hem, dat is mijn herte,

13

dien ic met my houden woude, op dat hi mi in v plaetse dienen mochte, inden banden der Euangelien,

14

maer sonder uwen raet en woude ic niet doen, op dat v goet niet en ware als wt noode, mer willichlijck.

15

⁺Ter auontueren is hi eenen tijt lanck van v gheweken, daerom, op dat ghi hem eewelic ontfinct,

+ D vers 15

16

nv niet als een knecht, mer als eenen alderliefsten broeder, sonderlinge mi, hoe veel te meer v beyde na den vleessche, ende na den HERE.

17

Daerom ist dat ghi mi hout voor eenen gheselle, so ontfanct hem als my.

18

Heeft hi v yet gheschaet, oft is hi v yet schuldich rekent dat mi toe.

19

Ic Paulus hebt met mijnder hant ghescreuen, ic salt betalen, Ic swijge, dat ghi v seluen mi schuldich sijt,

20

Ia lieue broeders latet gheschien, dat ic ws ghebruycke inden HERE, vermaent mijn herte inden HEERE.

21

Om tbetrouwen uwer ghehoorsaemheyt heb ic dit ghescreuen, wetende dat ghi meer, dan ic segge doen sult,

22

Ende bereyt mi mede die herberge, Want ic hope dat ic door uwer bedinge, v ghegeuen sal worden

23

Epaphras mijn medegheuanghene groet v in Christo Iesu, ende mijn medehulpers, Marcus, Aristarcus Deman, Lucas, Die gracie ons HEREN Iesu Christi si met uwen gheest Amen.

Dese Epistel was ghescreuen ende ghesonden van Romen door den knecht Onesimum.