Den Bybel met groter neersticheyt ghecorrigeert (Liesveltbijbel 1542)

[p. *]

¶ Die Apostel porret die bisschoppen tot verwaerders der armer menschen, inden dienst des HEEREN vermaent hijse om nae te volghen ootmoedicheyt ende ontfermherticheyt, ende ander duechden.

Dat .vi. Capittel

1

⁺DIe knechten die onder dat iock sijn, dye sullen haer heeren alle eere weert achten, op dat den name Gods ende die leere niet ghelastert en werde.

+ A vers 1

2

Maer die gheloouighe heren hebben, die en verachtense niet, want si broeders sijn, ende dies te meer dyenen hem, want si gheloouen ende liefhebben ende der weldaden deelachtich sijn.

⁺ Dit leert ende vermaent,

+ B vers 2

3

Ist dat yemant anders leert, ende niet toe en valt den saligen woorden ons HEREN Iesu Cristi, ende der leeringhe vander godsalicheydt,

4

dye is opgheblasen niet wetende, maer is nueswijs in vraghen, ende twistich in woorden, wt welcken coemt haet, twist, lasteringe, quaet vermoeden,

5

onnutte disputacien der menschen die gebroken sinnen hebben, ende der waerheit berooft sijn, die daer meynen, godsalicheyt te wesen om gheniets wille Sceyt v van dien.

6

Mer het is een groot geniet, wie godsalich is, ende laet hem genoegen

7

† Want wi en hebben niet in die werelt ghebracht, daerom ist openbaer, ⁺ wi en sullen daer ooc niet wt brenghen.

+ C vers 7

8

Als wy voetsel ende decsel hebben so laet ons vernoecht sijn,

9

Want die rijck willen werden, die vallen in becoringen ende stricken, ende in vele sotte ende schadelike begheerten, die den menschen versincken int verderuen ende in die verdoemenisse.

10

Want ghiericheyt is een wortel van alle quaet, der welcker sommige ghelustet heeft, ende sijn van tghelooue gedwaelt, ende hebben hen seluen vermengt onder veel smerten,

11

Maer ghi menschen Gods, vliet die dinghen, staet na die rechtuaerdicheit, dat gelooue, die liefde, die lijdtsaemheit, die saechtmoedicheit,

12

vechtet eenen goeden strijt des gheloofs, aengrijpt dat eewich leuen, waer toe ghi ooc gheroepen sijt, ende beleden hebt een goede belijdinghe voor veel ghetuyghen.

13

† Ic gebiede v voor God, die alle dinck leuendich maect, ⁺ ende voor Christo Iesu, die onder Poncio Pylato betuycht heeft een goede belijdinghe,

+ D vers 13

14

dat ghy hout dat gebot onbeulectelic onstraffelic, totter tijt toe der verschijninge ons HEREN Iesu Cristi. *

15

Die hi bewijsen sal tot sijnder tijt die salige ende allen geweldich die Coninc alder coningen, ende dye HERE alder HEREN,

16

die alleen heeft die onsterffelicheit, die daer woont in een licht daer niemant toe comen en can welcken geen mensche ghesien en heeft, noch ghesien en can, dien si eere ende eewich rijck Amen.

17

† Den rijcken van deser werelt ghebiet dat si nyet na hooghen dinghen en staen, noch niet en hopen op die onseker rijcdommen, maer op den leuendighen God, die ons gheeft alle dingen oueruloedelic te genieten,

18

dat si goet doen, ende rijck werden van goeden wercken, gheerne gheuen, ghemeen te wesen,

19

hen seluen schatten te vergaderen, eenen goeden gront int toecomende, op dat si vercrijghen dat eewige leuen.

20

O Timothee, bewaert wel dat v betrout is, ende schouwet die ongheestelijcke onnutte woorden, ende die wederpartie der valscher beroemder consten,

21

die welcke sommige hebben voorgegeuen, ende hebben des gheloofs ghemist.

Die ghenade si met v Amen. *

Ghescreuen van Laodice, hooftstadt in Phrigia.