Den Bybel met groter neersticheyt ghecorrigeert (Liesveltbijbel 1542)

¶ Die Apostel leert Timotheum hoe hi bidden sal, ende na spreect hi van tgebet, ende dat totten ondersaten.

Dat .ij. Capittel

1

⁺SO vermane ic v nv, datmen voor allen dingen ten eersten doen bidden, ^a gebeden, verbiddinghen, ende dancsegginghen voor alle menschen,

+ A vers 1

a Ghebeden, dat is alsmen door een ander wat begeert, gelijcmen begheert door cristum.

2

voor dye coninghen, ende voor alle ouerheydt, op dat wi rustich ende stil leuen leyden mogen in alre Gods salicheit ende redelicheyt.

3

Want dat is goet ende ooc aengenaem voor God onsen salichmaker,

4

die ooc wil dat alle menschen ghesont werden, ende totter kennissen der waerheyt comen.

5

Want daer is een God ende een middelaer tusschen God ende den menschen, te weten, die mensche Iesus Christus,

6

die hem seluen gegeuen heeft voor allen tot eender verlossinghen, ⁺ op dat, dat tot sijnder tijt gepredict soude werden,

+ B vers 6

7

waer toe ic ghesedt ben een predicaer ende een Apostel (ic segghe die waerheyt in Christo, ende en liege niet) een leeraer der Heydenen in dat ghelooue ende inder waerheyt. *

8

† Daerom wil ic dat die mannen sullen bidden in allen plaetsen, ende opheffen heylige handen sonder gramscap, ende tweedrachticheyt. ⁺

+ i.Petri iij.a

9

Desgelijcken die vrouwen, dat si in cierlijcken habijte, ⁺ in scamelheyt ende eerbaerheyt haer vercieren, niet met geulochten hayre, met gout oft peerlen, oft ander costelijcken gewade,

+ C vers 9

10

mer dat wel aenstae den vrouwen die daer goddiensticheit bewijsen door goede wercken,

11

Een wijf leere in stilheyt, ende met alder onderdanicheit,

12

Ick toelate een wijf niet dat si leere, ooc niet dat si des mans heer si, mer stille si,

13

⁺Want Adam is eerst gemaect, daer na Eua,

+ D vers 13

14

ende Adam en wert niet verleyt, mer dat wijf wert verleydt, ende heeft die ouertredinghe inghebracht,

15

si sal nochtans salich werden door kinderen baren, ist dat si blijft int ghelooue ende inder liefden, ende inder heylichmakinghen met eerbaerheyt.