Den Bybel met groter neersticheyt ghecorrigeert (Liesveltbijbel 1542)

Die apostel doet wech die meyninghe des toecoemsts van antekerst, waer af hi meerder bescheet thoonen sal.

Dat .ij. Capittel

1

⁺MAer ic bid v lieue broeders door der toecoemst ons HEREN Iesu Cristi, ende bi onser versaminge in hem,

+ A vers 1

2

dat ghi v niet haest en laet bewegen van uwen sinne, noch veruaren, noch door geest, noch door woort, noch door brief, als van ons ghesonden, dat den dach Christi voor handen is,

3

en laet v van nyemant verleyden in geenderley wijse, want hi en coemt niet, het en si dan, dat te voren een afscheyden come, ende gheopenbaert werde die mensche der sonden, ende dat kint der verdoemenissen,

4

die daer is een wederpartijer, ende hem verheft bouen al dat God oft Godsdienst heet, also dat hi hem sedt inden tempel Gods als een God, ⁺ ende gheeft hem wt, hi is God.

+ B vers 4

5

Gedenct ghi niet dat ic sulcx seyde doen ic noch bi v was?

6

Ende wat het noch ophoudt, weet ghi, op dat hi openbaer werden sal tot sijnder tijt.

7

Want hi werct hem seluen een verborghentheyt der boosheit sonder dat hijt nv ter tijt ophout, moet wech gedaen worden,

8

† ende als dan, sal die boosachtige gheopenbaert werden, welcken die HERE sal dooden metten gheest sijns monts, ende sal sijnder een eynde maken door die verschijninge sijnder toecoemst, *

9

des welcken toecoemst geschiet na der werckinghen des duuels,

10

⁺met alderley luegenachtige crachten ende teekenen ende wonder doen, ende met alderley verleydingen der ongerechticheyt, onder dien, die verloren werden, daer voor dat si die liefde der waerheit niet en hebben ontfanghen, dat si salich werden.

+ C vers 10

11

Daerom sal haer God seynden crachtige dolingen, op dat si gheloouen der logenen, op dat gheoordeelt werden alle

12

die der waerheit niet ghelooft en hebben, mer hebben der boosheyt gheconsenteert.

13

Maer wi sullen God dancken alle tijt om v, lieue broeders vanden HEERE, dat v God die eerste vruchte vercoren heeft ter salicheit, inder heylichmakinge des geests, ende int ghelooue der waerheyt,

14

daer hi v inne gheroepen heeft door ons Euangelium Iesu Christi. *

15

† Hierom so staet nv lieue broeders, ende houdt aen die settingen, ghi die geleert sijt, het si door ons woort oft Epistel.

16

⁺Mer onse HERE Iesus Christus ende God die vader die ons lief gehadt heuet, ende ghegeuen eenen eewighen troost, ende een goede hopinghe door ghenade,

+ D vers 16

17

die vermane uwe herten, ende stercke v in alderley leere ende goet werck.