Den Bybel met groter neersticheyt ghecorrigeert (Liesveltbijbel 1542)

Hier beghint die ander Epistele die Paulus sandt tot die van Thessalonica.

¶ Die Apostel danct God vander goeder bekeeringhe der Thessalonicensen, biddende voor beter volbringhinghe

Dat eerste Capittel

1

⁺PAulus ende Siluanus ende Timotheus.

Der vergaderinge van Tessalonica, in God onsen vader, ende den HERE Iesu Christo.

+ A vers 1

2

Ghenade si met v ende vrede van God onsen vader ende den HERE Iesu Christo.

3

⁺Wi sullen God dancken alle tijt om v, lieue broeders, gelijc behoorlic is, want v gelooue wast seere, ende die liefde eens yegelijcken onder v neemt toe onder malcanderen,

+ B vers 3

4

also dat wi ons uwer beroemen onder die vergaderinge Gods, van uwer verduldicheyt ende ghelooue, ⁺ in alle uwe veruolgingen ende tribulatien, die ghi verdraecht

+ C vers 4

5

tot bewisinge des gerechten ordeels Gods, op dat ghi weerdich wert tot den rijcke gods, ouer welcken ghi ooc lijdet,

6

Ist anders recht, by God te vergelden tribulatien, die v quellen, mer v die daer ghequelt wort, rust met ons,

7

wanneer die HERE Iesus openbaer wert vanden hemel met den engelen sijnder cracht,

8

ende met vlammenden vuere, die daer wraeck sal geuen ouer die, die God niet gekent en hebben, ende ouer die, die niet gehoorsaem en sijn gheweest den Euangelio ons HEREN Iesu Christi,

9

welcke sullen pijn lijden, dat eewige verderuen vanden aensicht des HEREN, ⁺ ende vander heerlicheyt sijnder stercheyt,

+ D vers 9

10

als hi comen sal hem te verclaren in sinen heylighen, ende wonderlijck te worden in allen gheloouigen, Want onse ghetuygenisse aen v tot deser tijt hebbet ghi gelooft,

11

ende daer toe bidden wi altijt voor v, dat onse HERE God v waerdich make des roepens, ende veruulle alle welbehagen der goetheyt, ende dat werc des geloofs inder cracht,

12

op dat aen v gepresen worde den naem ons HEREN Iesu Christi, ende ghi aen hem na der ghenaden ons Gods, ende des HEREN Christi.