Den Bybel met groter neersticheyt ghecorrigeert (Liesveltbijbel 1542)

Die Apostel beueelt hem seluen den bedingen vanden Collossensen, bethoonende hoese hem hebben sullen tegen die ongelouige sluytende die Epistel, ende confirmerende door groetenisse

Dat .iiij. Capittel

1

HOut v aen dat ghebet, ende waect daer in met dancsegginge,

2

ende bidt ooc te samen voor ons, op dat ons God die duere des woorts opdoe, te spreken die verborgentheyt Cristi, daer ick oock om

[p. *]

gebonden ben,

3

op dat ic dat selue openbare, gelijc ic spreken soude,

4

Wandelt inder wijsheyt tegen die ghene die daer buyten sijn, aensiende bequamen tijt,

5

V sprake si altijt inder genaden met sout ghemengt, op dat ghi weet hoe ghi eenen yegelijcken antwoorden sult. *

6

Hoet met mi staet, salt v condt doen Tybicius die lieue broeder ende getrouwe dienaer ende medeknecht inden HERE,

7

⁺welcken ic hebbe tot v ghesonden om des wille, op dat ic onderuinde hoet met v staet, op dat hi vermane uwe herten

+ B vers 7

8

met Onesimo den ghetrouwen ende lieuen broeder, welcke is vanden uwen dye v condt doen sullen van allen hoet hier staet.

9

Het groet v Aristarcus mijn mede gheuangen, ende Marcus den neue Barnabe, van welcken ghi hebt een gebot ontfangen, ⁺ Ist dat hi tot v coemt, ontfanget hem,

+ C vers 9

10

Ende Iesus die daer heet Gerechtich, dye wt der besnijdinghe sijn.

11

Dese sijn alleen mijn hulpers aen dat rijcke Gods, dye my een troost gheworden sijn. V doen groeten Epaphras, die vanden uwen is, een knecht Cristi, ende altijt worstelt voor v met gebeden, op dat ghi volcomelic moecht staen, ende veruult in allen den wille Gods

12

Ic geue hem getuygenisse, hi heeft een grote neersticheyt voor v, ende voor die van Laodicea, ende van Hierapoli,

13

Het gruet v Lucas die medecijnmeester, die liefste, ende Demas,

14

Groet die broeders tot Laodicea, ende Nympham, ende die ghemeynte in sinen huyse,

15

⁺Ende als die Epistel bi v gelesen is, so maect dat si ooc in die vergaderinge van Laodicea gelesen wert, ende dat die tot die van Laodicea is, v gelesen werde,

+ D vers 15

16

ende segt Arisippo, Siet den dienste aen die ghy ontfanghen hebt inden HERE, dat ghi dien veruult,

17

Mijn groete met mijnder hant Pauli. Gedenct mijnder banden. Die ghenade si met v Amen.

¶ Ghescreuen van Romen door Tychicon ende Onesimon.