Den Bybel met groter neersticheyt ghecorrigeert (Liesveltbijbel 1542)

Die Apostel informeert hier die Colossensen in goede manieren, ende dat specialic onder die gehoude onder die ouders, onder die kinder ende den knechten.

Dat .iij. Capittel

1

⁺HIer om sijt ghi nv opgestaen, met Cristo, so suect dat daer bouen is, daer Cristus is sittende totter rechterhant Gods

+ A vers 1

2

smaect dat hemels is, niet dat eerdts, is

3

Want ghi sijt ghestoruen ende v leuen is verborgen met Cristo in God,

4

Maer als Christus v leuen hem openbaren sal, dan suldi ooc openbaer werden met hem inder heerlicheit. * ⁺

+ ephe. v.b

5

+ Daerom so doot nv v leden, die op aerden sijn, hoererije, onreynicheyt luste, quade begeerte, oncuysheit, ende giericheit (welc is afgoderije)

6

om welcke coemt die toren Gods ouer die kinder der ongeloouicheyt,

7

in welcken ghi oock voortijts gewandelt hebt, doen ghi daer in leefde.

8

Mer nv legget al van v, gramscap, verbolghentheyt, boosheit, blasphemie, scandelicke woorden, wt uwen mont,

9

liecht niet onder malcanderen, treckt den ouden mensce wt met sinen wercken,

10

⁺ende treckt den nyeuwen aen, ⁺ die vernyeut wert totter kennisse Gods, na sijns selfs beelde, die hem gescapen heeft

+ B vers 10

+ .I.pe. ij c.

11

daer en is niet Griec, Iode, besnijdinghe, onbesnijdinge, Barbaren, schyten, knecht, vrije, maer al ende in allen Christus. *

12

+ Daerom so treckt nv aen, als die wtuercoren Gods heyligen ende beminden, hertelicks ontfermen, vriendelicheyt, ⁺ ootmoedicheyt, saechtmoedicheit lancmoedicheyt,

+ C vers 12

13

ende houdt die een den anderen tot goet, ende vergeeft die een den anderen als yemant eenige clachte tegen den anderen heeft, ghelijc Christus vergeuen heeft, also ooc ghi.

14

Mer bouen also trect aen die liefde, die daer is den bandt der volcomenheydt,

15

ende die vrede Gods behoude die ouerhant in uwer herten, tot welcken ghi ooc gheroepen sijt in eenen lichaem, ende sijt dancbaer

16

⁺Laet dat woort Gods rijckelijck in v woonen, in alle wijsheyt. ⁺ Leert ende vermaent v seluen met psalmen ende lofsangen, ende in geesteliken liedekens inder genaden, ende singet den HEERE in uwer herten,

+ D vers 16

+ ephe. vi.a

17

ende al wat ghi doet met woorden, of met wercken, dat doet al inden naem ons HEEREN Iesu, ende dancket God den vader door hem. *

18

Ghi vrouwen sijt onderdanich uwen mans, gelijckt behoort inden HEERE.

19

ghi mans hebt lief v wijfs, ende en sijt niet bitter tegen haer,

20

Ghi kinder sijt gehoorsaem den ouders in allen dingen, wandt dat is den HEERE behaechlijck,

21

Ghi vaders en bekijft v kinderen niet, op dat si niet cleynmoedich en worden.

22

Ghi knechten zijt gehoorsaem in allen dingen uwen lijflijcken Heere, niet met dienst voor oogen, als die menscen te behaghen, maer met simpelheyt des herten, ende met vreese Gods,

23

al wat ghi doet, dat doet van herten, als den HEERE ende niet den menscen,

24

ende weet, dat ghi van den HERE ontfangen sult dye vergeldinge der erffenissen, Want ghi dient den HERE Iesu Cristo,

25

Wie onrecht doet, die sal ontfangen wat hi onrechts ghedaen heeft, ⁺ want het en is gheen aensien der personen,

+ actu. x e.

26

Ghi heeren, wat recht ende ghelijc is, dat bewijst den knechten, ende weet dat ghi ooc eenen HERE hebt inden hemel. *