Den Bybel met groter neersticheyt ghecorrigeert (Liesveltbijbel 1542)

[p. *]

¶ Die Apostel vermaent die van Ephesen om Godt te dancken, aengesien dat hise van haren sonden verlost hadde, ende dat hijse wtgesceyden had vanden anderen volcke.

Dat .ij. Capittel.

1

⁺ENde ooc ghi, doen ghi doot waert, door ghebreken ende sonde,

+ A vers 1

2

in welcken ghi oock voortijts gewandelt hebt, na den loop deser werelt, ende nae dyen vorst der ouerheyt die in die locht regeert te weten na den geest, die daer sijn werck heeft in die kinderen des ongheloofs,

3

onder welcken wi ooc alle voortijts ons wandelinge ghehadt hebben, met luste ons vleeschs, ende deden den wille des vleeschs, ende des verstants, ende waren ooc kinderen des thorens, van natueren gelijc die andere.

4

Mer god die daer rijc is van barmherticheit, door sijn grote liefde, daer hi ons mede lief gehadt heeft, ⁺ doen wi doot waren inder sonden, heeft hi ons te samen in Christo leuende gemaect (want wt ghenaden sidi salich geworden)

+ B vers 4

5

ende heeft ons met hem op verwect, ende met hem geset in des hemels wesen, door Cristum Iesum,

6

op dat hi soude toonen inden toecomenden tijden die oueruloeyende rijcdommen zijnder genaden, met sijnder vriendelicheyt ouer ons dooor Iesum Cristum,

7

Want wt genaden sijt ghi salich geworden door tgelooue, ende dat niet wt v, Tis Gods gaue,

8

niet wt den wercken, op dat hem niemant en beroeme,

9

Want ghi sijt sijn werc, gheschapen door Cristum Iesum tot goede wercken, tot welcken God ons te voren bereyt heeft dat wi daer in wandelen souden.

10

Daerom gedenct, dat ghi die voortijts geweest sijt heydenen na den vleessce, ende die Heydenschap wert genoemt van dyen, die genoemt sijn besnijdinge na den vleessche, die metter hant gesciet,

11

dat ghi totter seluer tijt waert sonder Cristo, Waeromme ghi vreemt geuonden waert vander borgerscap Israel, ende waert gasten in die testamenten der beloften, daer wt ghi geen hopinge en hadt, ende waert ^a sonder God inder werelt

a sonder god, dats die God nyedt en kennen psal. xiij lu. ij.c

12

Mer nv ghi die in Christo sijt, ende voortijts verre waert, sijt nv na bi geworden, door dat bloet Cristi.

13

Want hi is onse vrede, die wt beyden heeft een gemaect, ende heeft af gebroken die middel, want die den tuyne tusscen ons was, te weten, die vyantscap, daer mede dat hi heeft door sijn vleesch wech ghenomen

14

die wet der geboden, so verre si scriftelic beuangen waren, op dat hi wt den tween eenen ^b nyeuwen mensce soude sceppen hem vrede te maken,

b den nieuwen mensce dats door den heiligen geest vercoren

15

ende dat hi die beyde versoenen soude met God in een lichaem door dat cruys, ende heeft die vyantscap gedoot door hem seluen,

16

ende is ghecomen, ende heeft vercondicht inder Euangelien, v den vrede, ghi die verre waert, ende dyen die na waren,

17

Want door hem hebben wi den toeganc alle beyde in eenen geest totten vader.

18

† Daerom so en sijt ghi nv niet meer gasten ende vreemdelingen, mer borgers metten heiligen ende huysgenoten Gods

19

opgetimmert op den gront der Apostelen, ende der Propheten, daer Ihesus Cristus den hoecsteen af is,

20

⁺op welcken, welckerley timmeringe in een ander geuoecht wert, die wasset tot eenen heyligen tempel inden HERE,

+ D vers 20

21

op welcken ghi oock mede ghetimmert wort tot eender woonstat Gods inden geest. *