Den Bybel met groter neersticheyt ghecorrigeert (Liesveltbijbel 1542)

¶ Die Apostel wtsluytende alle quaet vermoet, leert datmen die aelmoessen gheringe gheuen sal oueruloedelick ende blijdelijc.

Dat .ix. Capittel

1

⁺MEr vander hantreyckinge inden heiligen en is mi geen noot te scriuen,

+ A vers 1

2

Want ic weet uwe geneychde gemoet, daer ic mi af beroeme, bi die van Macedonia, ende segge, Achaia is oock bereyt gheweest van int voorleden iaer, ende v ernstige liefde heefter vele getrocken.

3

Wy hebben die broeders daerom gesonden, op dat onse beroeminge van v niet te niet en soude gaen, in deser saken, ende dat ghy bereyt sijt, gelijc wi van v geseyt hebben,

4

op dat wi niet beschaemt en worden als die van Macedonien met my quamen, ende v onbereedt vonden, ic en wil v niet seggen in sulcke vermetentheyt des beroems.

5

⁺Daerom sach ic dat noot was die broeders te vermanen, dat si te voren tot v quamen, om te eer bereet te maken, dese te voren beloofde benedictie, op datse bereyt si, also dattet si een benedictie, ende niet een giericheit

+ B vers 5

6

† Ic meyne so wie dat vreckelic saeyt, die sal vreckelic maeyen, ende wie dat saeyt in ^a benedictien, die sal in benedictien mayen,

a In benedictien saeyen, dats simpelick ende vriendelijck wt goeder herten wel doen. Esaie. xxxvi.a Gene. xxxiij.b

7

Een yegelic na dat hi te voren in sijn herte begrepen heeft, niet wt droefheit of wt noot,

8

want eenen vrolijcken geuer heeft God lief.

⁺ God can maken, dat alderhande genade in v ouer rijckelic si, dat ghy in allen dingen ghenoech voor v hebt, ende rijc sijt tot alderhande goede wercken,

+ C vers 8

9

gelijc alsser gescreuen staet. Hij heeft wtgestroyt, ende den armen gegeuen, sijn gerechticheyt blijft inder eewicheyt

10

Die den sayer saet gheeft, die sal v oock ymmer dat broot geuen tot der spijsen, ende v saet vermeeren, ende laten wassen dat gewas van uwer gerechticheit, *

11

op dat ghi rijc sijt in allen dingen, tot alder simpelheyt, ⁺ die door ons Gode dancbaerheyt werct.

+ D vers 11

12

Want die hantreyckinghe van deser aelmoessen en veruult niet alleene dat gebrec der heyligen, mer is ooc oueruloedich daer in, datter vele God dancken

13

door desen beproefden dienst, ende prijsen God om uwe onderdanige belijdinge des Euangelijs Cristi ende om uwe simpele gemeynscap, met hen

14

ende met allen in haer gebet voor v, ende verlangen na v, om der oueruloediger ghenaden Gods wille in v,

15

God si danc voor sijn onsprekelijcke gaue.