Den Bybel met groter neersticheyt ghecorrigeert (Liesveltbijbel 1542)

Die Apostel prijst die misterie vanden nyeuwen testamente, als totter werckinghe der Godheydt ende als afneminghe der quaetheyt.

Dat .iiij. Capittel.

1

⁺DAerom, ter wijlen wi sulcken ambacht hebben, na dien dat ons ontfermherticheit gheschiet is, so en werden wi niet luefich,

+ A vers 1

2

mer wi wijsen van ons die verborgentheden der scanden, ende en wandelen niet in boosheden, ende en verualschen ooc Gods woort niet, mer wi openbaren die waerheit ende bewijsen ons wel tegen alle conscientien der menschen voor God.

3

⁺Is nv ons Euangelie bedect, so ist bedect inden genen die verloren werden,

+ B vers 3

4

onder welcken ^a God deser werelt verblint heeft der ongelouigen sin, op dat haer niet en scijne die verlichtinge der euangelien, vander claerheyt Cristi, die welcke is dat gelijcke beelt Gods.

a god der werelt, dats dye duuel. ephe. ij.a

5

† Want wi en preken ons selue niet, maer Ihesum Cristum dat hi die HERE is, * ende wi v knechten om Ihesus wille,

6

want God die tlicht wt die duysterheyt liet schijnen, die heeft ons claren schijn in onse herten ghegeuen, dat door ons voort quame die verlichtinge vander claerheyt der kennisse Gods int aensichte Iesu Christi.

7

⁺Wi hebben alsulcken schat in aerden vaten, op dat die cracht, ist dat si bouen bliue, datse van God is, ende niet van ons,

+ C vers 7

8

Wi hebben in alle dingen tribulatie, mer wi en sijn niet benaut, wi werden gedrongen, mer wi en versagen niet,

9

wi lijden veruolch, mer wi en worden niet gelaten, wi worden verdruct, mer wi en vergaen niet,

10

ende omdraghen altoos die doodinghe ons HEREN Iesu Cristi, op dat ooc dat leuen ons HEREN in onsen lichaem geopenbaert worde. *

11

Want wi die leuen worden altoos inder dood ouer gegeuen, om Iesus wille, op dat ooc dat leuen Iesu geopenbaert werde in onsen sterffelicken vleessche,

12

Daerom so is die doot nv machtich in ons, maer dleuen in v,

13

aengesien dat wi den seluen gheest des geloofs hebben (na datter gescreuen is, Ic heb gelooft daerom heb ic gesproken) also hebben wi ooc ghelooft daerom spreken wi ooc,

14

ende weten dat die gene die Iesum verwect heeft, ⁺ die sal ons ooc verwecken door Ihesum, ende sal ons met v daer stellen, ⁺

+ D vers 14

+ psal. cxv

15

Want het is mi al om v te doen, op dat die oueruloedige gratie door dancsegginghen van velen God rijckelic prijse.

16

Daerom en werden wi niet moede, mer al ist dat onse wtwendige mensche veroudt, so wert nochtans den inwendigen van dage te dage vernyeut,

17

Want onse tribulatie die tijtlic ende licht is, werct een eewige ende bouen alle maetwichtige heerlicheit, ons, die niet en sien op tgene dat sienlic is, mer op tgene dat onsienlic is,

18

Want tghene dat sienlic is, dat is tijtlijc, mer tghene dat onsienlic is, dat is eewich.