Den Bybel met groter neersticheyt ghecorrigeert (Liesveltbijbel 1542)

¶ Die Apostel thoont dat hi niet en begeert lof der menschen oft hi en soecket ooc niet, ende prijst die dienaers Cristi, na weerdicheyt der officien ende vander excellencien der kennissen.

Dat .iij. Capittel.

1

⁺BEginnen wi ons weder te prijsen? Of behoeuen wi als sommige lofbrieuen aen v, oft lofbrieuen van v,

+ A vers 1

2

Ghi sijt onsen brief in onse herten gescreuen, die bekent ende gelesen wert van alle menschen

3

dien ghi openbaer geworden sijt, dat ghi eenen brief Cristi sijt, door onsen dienst daer toe bereyt, niet met incte gescreuen, maer met den geest des leuenden Gods,

[p. *]

niet in steenen tafelen mer in vleesscelicken tafelen des herten.

4

† Een sulcken betrouwen hebben wi door Cristum tot God,

5

niet dat wi bequaem sijn yet te dencken, als van ons seluen, mer dat wi wat bequaem sijn, dat is van God,

6

die welcke ons ooc bequaem gemaect heeft dienaers te sijn des nyeuwen testaments, ⁺ niet der letteren, mer des ^a geests, Want die letter slaet doot, mer den gheest maect leuende.

+ D vers 6

a geests dat is der liefden gods, ende des naesten

7

Mer ist dat den dienst die door die letter dootslaet ende in steenen gebeelt claerheit hadde, also dat de kinderen van Israel dat ^b aensicht Moysi niet en consten aengesien, om der claerheyt van sinen aensichte die doch ophout,

b moyses aensicht, dats dye kennisse der wet, ende die cracht der sonden Exodi xxxiiij d

8

hoe veel te meer en soude niet den dienst, dye den gheest gheeft, claerheyt hebben?

9

Want ist dat den dienst die de verdoemenisse preect claerheit hadde, veel te meer is den dienst die de gherechticheit preect, oueruloediger in claerheyt *

10

want ooc dat ander deel datter verclaert was, en is nyedt verclaert, tegen dese ouermatige claerheit,

11

want ist dat sake dattet claerheit hadde, dat ghene dat ophout veel meer salt claerheyt hebben het gene datter blijft.

12

Nv wi alsulcken hope hebben, so gebruycken wi grote vrimoedicheit,

13

ende en doen niet gelijc Moyses, die een decsel voor sijn aensicht hinc, also dat die kinderen van Israel niet gesien en consten, op tgene datter ophout,

14

mer haer sinnen sijn verhert,

15

Want tot op den dach van heden so blijft dat selue decsel bedect, ⁺ ouer dat oude testament, wanneer sijt lesen het welcke in Cristo ophout.

+ Ex xiiij.d

15

Mer op desen tegenwoordigen dage wanneer Moyses gelesen wort, is dat decsel voor hare herte gehangen,

16

Mer wanneer het hem bekeert tot den HERE, dan wort dat decsel afgedaen,

17

Want die HERE is een geest, daer den geest des HEREN is daer is vriheyt

18

† Mer nv spiegelt haer in ons allen, die claerheyt des HEREN, van dat onbedecte aensicht, ende wi worden in dat selue beelt verclaert van deen claerheit totter ander, als vanden HERE die daer den geest is.