Den Bybel met groter neersticheyt ghecorrigeert (Liesveltbijbel 1542)

Die Apostel leeert hoe datmen sal conuerseren met die van buyten ende met die ghebueren, ende int eynde des epistels, daer leert hi van onse behoudenisse oft salicheyt

Dat .xvi. Capittel

1

⁺VAn die hantreykinge, die den heyligen gesciet, gelijc ic die vergaderinge in Galatia beuolen hebbe, also doet oock ghi

+ A vers 1

2

op der sabbathen een, een yegelijc onder v, sette hem bi hem seluen, ende versame wat hem wel te doen is, op dat niet als ic come, dan alder eerst niet die hantreyckinge te vergaren en is,

3

Mer wanneer ic daer gecomen ben, welcke ghi door brieuen daer voor aensiet, die wil ic seynden, dat si daer brengen v weldaet in Ierusalem,

4

Mer ist waer dat ic ooc daer toe reyse, sullen si met mi reysen,

5

Mer ic sal tot v comen, wanneer ic door Macedonien reyse, Want door Macedonien sal ic door gaen,

6

Bi v sal ic ter auontueren bliuen oft ooc daer winteren, ⁺ op dat ghi mi gheleyt, waer ic henen reyse.

+ B vers 6

7

Ic en wil v nv ter tijt niet sien inder oueruaert, want ic hope, ic wil wat tijts bi v blijuen, ist dat die HERE toe laet,

8

Ic sal tot Ephese blijuen tot Sinren

9

Want mi is een groote crachtige duer op gedaen ende daer zijn vele wederpartijders,

10

Is dat Timotheum coemt, so siet toe dat hi sonder sorghe bi v si. Want hy werct ooc dat werc des HEREN, gelijc ic.

11

Daerom dat hem nyemant en verachte, geleyt hem in vrede, dat hy tot mi come, Want ic verwacht sijnder metten broederen.

12

Van Appollo wetet, dat ic hem seer veel vermaent hebbe, dat hi tot v quame met den broederen, maer het en was geensins sinen wille, dat hi nv comen soude, ⁺ Mer hi sal comen, alst hem gelegen sal sijn,

+ C vers 12

13

waket staet int gelooue, doet manlijc ende sterct v,

14

Alle v dingen laet gaen inder liefden.

15

Ic vermane v lieue broeders, Ghi kent dat huis Sthephane, dat si sijn die eerstelingen in Achaya, ende hebben hen seluen geordineert tot den dienst der heyligen

16

op dat ghi ooc sulcken onderdaen sijt, ende allen die mede wercken ende arbeyden.

17

Ic verblijde mi van die toecomste Stephane, ende Fortunati, ende Achaici, want uwe gebrec hebben si veruult,

18

Si hebben vermaket mijnen ende uwen geest, bekentse die sodanige sijn.

19

⁺Het groeten v die gemeynten in Asia, Het groeten v seere in den HERE Aquilas ende Pressilla, ende altesamen die gemeynte in haren huyse.

+ D vers 19

20

Alle dye broeders grueten v, Gruet v onder malcanderen met den heyligen cusse,

21

Die gruete met mijnder hant Pauli, *

22

Ist dat yemant den HERE Iesum Cristum niet lief en heeft, die is ^a Anathema, Macharan Moth,

a anathema dat is verbannen wter gemeynten

23

Die genade des HEREN Ihesu Cristi si met v,

24

Mijn liefde si met v allen in Christo Ihesu AMEN

So wil Paulus seggen wie Cristum niet en bemint, die is verbannen totter doot Leuitici int leste.