Den Bybel met groter neersticheyt ghecorrigeert (Liesveltbijbel 1542)

Hier strafe die Apostel den Corinthen vanden Rechters, voor die welcke si keuen ende dingden, van die saken die si onder malcanderen hadden Ende int eynde leert hi weder om, ende straft die sonde van oncuysheyt.

Dat .vi. Capittel

1

⁺HOe derf yemant onder v, die eenigen twist heeft tegen den anderen vanden onrechtuaerdighen hem laten oordeelen ende niet vanden heyligen?

+ A vers 1

2

Oft en weet ghi niet, dat die heyligen die weerelt oordeelen sullen, Ende oft die werelt van v gheoordeelt sal werden, zijt ghi dan niet goet ghenoech minder saken te oordeelen?

3

Weet ghi niet dat wi ouer dye engelen sullen ordeelen, hoe veel te meer ouer wereltlicke dingen?

4

Daer om ist dat ghi ordeel saken van dese tijtlijcke dingen hebt, so neemt die verachste vander kercken, ende die selue set tot rechteren

5

Dit segge ick tot uwer schanden. En isser nyemant also wijs onder v, oft doch niet eene, die geoordeelen conste tusscen broeder ende broeder?

6

Mer deen broeder metten anderen, laet hem ordeelen, dair toe voor die ongelouige

[p. *]

7

Het is een groote misdaet onietnder v, dat ghi deen metten anderen recht.

8

Waerom en laet ghi v niet lieuer onrecht doen, waer om en laet ghi v niet lieuer verongelijcken? ⁺ Mer ghi doet selue onrecht, ende verongelijct, ⁺ ende dat den broederen.

+ B vers 8

+ eph. v.

9

† Oft en weet ghi niet dat die onrechtuerdige dat rijcke Gods niet en sullen eruen?

10

En laet v niet verleiden, Noch oncuyssche menscen, noch dienaers der Afgoden, noch ouerspeelder, noch die wreken, noch die tegen natuer oncuyscheit doen, noch dieuen, noch gierige, noch dronckaerts, noch kiuers, noch roouers en sullen dat rijc Gods niet besitten.

11

Ende dusdanige hebt ghi somighe geweest, mer ghi sijt afgewasschen, gheheylicht, ende gereynicht, ende gerechtuaerdicht door den naem ons HEREN Iesu Cristi, ende door ons Gods geeft *

12

⁺† Ic hebbe alle dingen macht, maer alle dingen en sijn mi niet orbaerlic Alle dingen heb ic macht mer ic en wil onder niemants macht sijn.

+ C vers 12

13

Die spijse hoort den buyc toe, ende den buyc hoort der spisen toe. Mer God sal den buyc ende die spise te niet maken Dat lichame en is niet sculdich der oncuysheyt te dienen, mer den HERE, ende die HERE den lichaem,

14

Want God heeft den HERE verwect, ende hi sal ons ooc door zijn cracht verwecken.

15

Broeders, en weet ghi niet dat uwe lichamen, leden Christi zijn? Sal ic daeromme nemen dye leden Christi, ende makense leden eender hoeren? Dat si verre van ons.

16

Oft en weet ghi niet, die eenen oncuyscen wiue aenhanct, dat hi met haer een lichaem is? Want hi seyde, twee sullender zijn in een vleesch.

17

Mer die den HERE aenhanct die is een gheest. *

18

⁺⁺ Vliet die oncuysheyt. Alle sonde die die mensce doet is buyten den lichame. Mer die oncuysheydt doet, die sondicht in sinen lichame.

+ D vers 18

+ Ge. ij.d.

19

Oft en weet ghy nyet dat uwe leden sijn eenen tempel des heylighen geests die in v is, die ghy van Gode hebt, ende ghi en sijt v selfs niet?

20

Want ghi sijt dyer ghecocht. Daer om glorificeert ende looft God in uwen lichame, ende inden gheest, dwelck God toebehoort.