Den Bybel met groter neersticheyt ghecorrigeert (Liesveltbijbel 1542)

Hi bethoont waer in die Ioden beter waren dan die Heydenen proeuende dat die Heydenen also wel als die Ioden behoeftich waren der gratien Gods

Dat .iij. Capittel

1

⁺WAt voordeel hebben dan nv die Ioden oft wat baedt haer die besnijdenisse? voorwaer seer vele. Ten eersten is hen betrout dat God ghesproken heeft.

+ A vers 1

2

Wat leyt daer aen, al ist dat die sommighe daer aen niet en geloouen?

3

Soude haer ongheloouicheyt Gods belofte te niet maken? Dat si verre, mer het blijue veel beter also, dat God warachtich si, ende alle menscen logenachtich,

4

Ghelijc als ghescreuen is. Op dat ghi rechtueerdich sijt in uwen woorden, ende dat ghi verwint wanneer ghi gheoordeelt wert

5

Mer ist sake dat onse onrechtueerdicheyt Gods rechtueerdicheyt prijst, ⁺ wat sullen wi seggen? Is God dan onrechtuaerdich, dat hi daer om gram wort? (Nae der menscen maniere spreeck ick) Dat si verre.

+ ioan. iij.d. psal. cxv psalm. i.

6

Hoe soude dan God die werelt connen oordeelen?

7

Want ist dat die warachticheyt Goods verheuen is, ouermidts mijn loghenen tot sijnder glorien, waerom soude ic dan noch als een sondaer gheoordeelt worden? Ende niet veel meer also doen

8

(gelijc wi ghelachtert worden, ende sommige spreken dat wi seggen souden) laet ons quaet doen, op dattet goet daer wt come, der welcker verdoemenisse rechtueerdich is

9

Wat seggen wi dan nv: hebben wi voordeel? In geender manieren, ⁺ Want voor hebben wi met redenen bewesen, dat die Ioden ende die Griecken alte samen onder die sonden sijn,

+ B vers 9

10

gelijc dat ghescreuen is, Daer en is nyemant rechtueerdich, iae niet een, Daer en is niemant die verstandich is,

11

Daer en is nyemant die na God vraecht,

12

Alle zijn si afgeweken, tsamen sijn si onnut geworden, daer en is niemant die goet doet, daer en isser ooc niet een

13

Haer kele is een open graf, haer tongen hebben si tot bedroch ghebruyct, venijn der slangen is onder haer lippen.

14

Haren mont is vol van ^a vloeckens ende bitterheyts,

a Vloeckinghen dat is allet ghene datter gehouden ende ghesustineert wort teghen dat woort Goods.

15

haer voeten sijn snel om te storten bloet.

16

Verstooringhe ende verbrekinghe is in haren weghen,

17

ende den wech des vreden en weten si niet,

18

die vreese Gods en is niet voor haer ooghen.

19

⁺† Mer wi weten so wat die wet seyt, dat seytse tot-ten ghenen die onder die wet sijn, op dat alle mont gestopt worde, ende dat alle die werelt God schuldich si

+ C vers 19

20

Daerom, om dat geen vleesch door die wercken des wets voor hem rechtueerdich sijn en mach,

21

want door die wet en coemt niet dan kennisse der sonden.

Mer nv sonder toedoen der wet so is die rechtueerdicheyt, die voor God gelt geopenbaert, betuyget door die wet ende Propheten,

22

Mer ic segge vander gherechticheyt voor God, die daer coemt door tgelooue in Iesum Christum, tot allen ende op allen die daer gelouen

23

Want hier en is geen onderscheyt, si sijn alle sondaers, ende behoeuen des ^b prijs dye God aen hen hebben soude,

b Prijs dat is die kennisse der rechtuaerdichmakinge die van gode ghegeuen wort

24

ende werden sonder verdienst gerechtuerdicht wt sijnder genaden, door die verlossinge die door Christum gheschiet is,

25

welc God voor ghestelt heeft tot eenen stoel der Ghenaden, door tgelooue in sinen bloede Waer mede hi die gerechticheit die God acht bewijsde, in dien, dat hi vergheeft die sonden die te voren gesciet sijn

26

die onder die Godlike gedoochsaemheyt die hi droech, op dat hi tot desen tijden bewijsen soude die rechtuerdicheyt die voor hem geacht is op dat hi alleen gerechtich si, ende rechtuaerdich make den genen die daer is int ghelooue Iesu Christi. *

27

Waer is nv dan uwen roem? si is wtgestoten, door welcke wet, door die wet der wercken? niet also, mer door die wet des gheloofs

28

So houden wi nv, dat die mensce gherechtuerdicht wordet door dat ghelooue, sonder die wercken des wets,

29

Oft is God alleene der Ioden God, is hi ooc niet der Heydenen God, Iae hi vry, hi is ooc der Heydenen God,

30

want het is een God die rechtuaerdich maect die besnijdinge wt den gelooue, ende oock die onbesnijdenis wt den gelooue

31

Hoe maken wy dan die wet te nieute door tgelooue, dat si verre, mer wi stichten ende beuestighen die wet.