Den Bybel met groter neersticheyt ghecorrigeert (Liesveltbijbel 1542)

Hoe Paulus seluer den president antwoorde, ende hoe si met sijnder antwoorden loeghen

Dat .xxvi. Capittel

[p. *]

1

⁺AGrippias seyde tot Paulum. Het wort v geoorloft voor v seluen te spreken Doen verantwoorde hem Paulus met wtgerecte hant.

+ A vers 1

2

Lieue Agrippa, ic achte mi salich te sijn, om dat ic mi heden voor v verantwoorden sal, van allen dyen daer ic vanden Ioden af besculdicht worde.

3

Aldermeest, want ghi alle die seden ende vragen weet, die bi den Ioden gewoonlic sijn, daerom bid ic v dat ghi mi verduldich wilt hooren

4

Tis waer, alle Ioden die mi eerste van begin ghekent hebben, ⁺ weten mijn leuen van ioncx op, hoe dattet van begin onder desen volcke te Ierusalem vergaen is, waert dat si daer getuych af wouden geuen

+ B vers 4

5

Want na desen alder strencsten secten ons Iootscaps heb ick een Pharizeus geleeft,

6

ende nv stae ic ende worde geoordeelt inden hope der beloften die van Gode tot onsen vaderen gesciet is,

7

tot welcker onser twalef geslachten gestadelic dach ende nacht Gode dienende hopen te comen, van welcker hopen wegen, lieue Coninc Agrippa, ic vanden Ioden besculdicht worde,

8

waerom wort dat voor ongelouelic bi v gheoordeelt, dat God die dooden verwect.

9

⁺Tis waer, ic meynde ooc bi mi seluen veel teghen den naem Iesu van Nazareth te doen.

+ C vers 9

10

Also ic ooc tot Hierusalem gedaen hebbe, doen ic vele heyligen in die kerckeren sloot, vanden ouersten Priesters machte daer toe ontfangen hebbende, ende als si gedoot worden bracht ic dat oordeel,

11

ende die dicwils pinigende door alle die scolen, dwanc icse te lasteren of te blasphameren ende wter mate ontsinnich op hen, veruolchde icse ooc tot in die vreemde steden.

12

Om welc, doen ic tot Damascum reysde, met macht ende oorlof vanden ouersten priesters, so sach ic tsmiddaechs inden wech lieue coninc, dat een licht vanden hemele, claerder dan der sonnen schijnsele, mi ende die met mi reysden, omsceen ende omlichte

13

⁺Mer doen wi al ter aerden neder geuallen waren, hoorde ic een stemme tot mi sprekende, segghende in hebreussce, Saul Saul, wat veruolcht ghi mi? Het sal v swaer vallen tegen den prickel te sporren,

+ D vers 13

14

Ic seyde HERE wie sijt ghi? Hi seyde Ic ben Iesus dien ghi veruolcht,

15

mer staet op, ende staet op v voeten, want daer toe heb ic v geopenbaert, dat ic v tot eenen dienare ende getuyge soude stellen des geens dat ghi ghesien hebt, ende ic v noch wil laten verscijnen,

16

ende wil v verlossen vanden volcke, ende vanden Heydenen daer ic v nv toe seynde,

17

haer ooghen op te doen, op dat si vander duysternissen totten lichte bekeert mogen worden, ende vander macht des duuels tot God,

18

op dat si vergiffenisse der sonden ontfangen, ende dat erue met den genen die door tgelooue in mi geheylicht worden

19

⁺Daer wt lieue Coninc Agrippa, en was ic der hemelscer openbaringen niet ongeloouich,

+ E vers 19

20

mer ic vercondichdese eerst die van Damasco, ende te Ierusalem ende door alle dat Iootsce lant, ooc den Heydenen, dat si boete souden doen, ende tot Gode bekeert souden worden, Doende oprechte wercken der boeten,

21

Om deser saken wille hebben mi die Ioden inden tempele begrepen, ende leggen daer op toe mi te dooden.

22

Mer door die hulpe Gods mi verleent, stae ic tot desen dage toe getuygende den cleynen ende den grooten, ende en segge niet buyten dat die Propheten geseyt hebben, dat geschyen soude, ⁺ ende Moyses,

+ F vers 22

23

dat Cristus lijden soude, ende die eerste sijn wt die verrisenisse der dooden, een licht den volcke ende den Heydenen vercondigende.

24

Doe hi hem aldus verantwoorde, seyde Festus met luyder stemmen Paule, ghi raest. ⁺ Die grote consten maken v ontsinnich,

+ G vers 24

25

Mer hi seide. Alder liefste Feste, ic en rase niet, mer ic spreke warachtige ende nuchtere woorden, want die coninc weet wel tot welcken ic vrylic spreke,

26

Ic en meyne niet dat hem eenige van desen verborgen sijn, want ten is in geenen winckel oft hoecken gesciet.

27

Coninck Agrippa, ghelooft ghi den Propheten? Ic weet dat ghi haer ghelooft

28

Agrippa seyde tot Paulum, het en falgeert niet vele, ghi en brencter mi toe dat ic een Christen werde.

29

Paulus seyde, Ic wensche van Gode, dat noch aen vele noch aen weynich en faelgere, niet alleen aen v mer alle die mi heden hooren sodanighe te worden als ic ben, wtgenomen dese banden,

30

Ende dit gheseyt hebbende, stont die Coninc op ende die president, ende Bernice, ende die met hem saten,

31

ende doen si besiden af gegaen waren, spraken si met malcanderen seggende Dese mensce en heeft niet ghedaen dat der doot of den banden weerdich si,

32

Agrippas seyde tot Festum Men hadde desen mensche los mogen laten ghaen waert sake dat hi hem nyet op den Keysere en hadde beroepen.