Den Bybel met groter neersticheyt ghecorrigeert (Liesveltbijbel 1542)

¶Van die verrijsenisse Christi, ende hoe hi hem openbaerde Maria Magdalena ende sijn discipulen, ende gaf hen den vrede, ende den heylighen gheest

Dat .xx. Capittel.

[afbeelding]

1

⁺† ENde op eenen dach des sabboths quam Maria Magdalena vroech, doent noch duyster was, totten graue, ⁺ ende sach dat den steen vanden graue wech was,

+ A vers 1

+ Matth xxviij g mar. xv a Luce. xxiiij.a

2

Doen liep si ende quam tot Symon Peeter, ende totten anderen discipule, den welcken Iesus lief hadde, ende seyde tot hen, Si hebben den HERE wech ghenomen wt den graue, ende wi en weten niet waer si hem gheleyt hebben.

3

Doen ghinc Peeter ende die ander discipel wt, ende quamen totten graue,

4

Die twee liepen ghelijc, ende die ander Ionger liep snellijcker dan Peeter, ende quam eerst aent graf,

5

ende sach daer in, ende sach die lijnen doecken geleyt, mer hi en gincker niet in.

6

Doen quam Symon Petrus hem na, ende ginc int graf, ende sach die lijnen doec-ken geleyt,

7

⁺ende sach den sweetdoec, dien Iesus om thooft gebonden was, niet bi die lijnen doecken geleyt, mer besiden ingewonden, in een bysonder plaetse.

+ B vers 7

8

Doen ghinc die ander discipel ooc in, die eerst totten graue quam, ende sach ende gheloofde,

9

Want si en wisten die scrift noch niet, dat hi vanden dooden verrijsen moeste. *

10

Doen ghinghen die discipulen weder te samen.

[afbeelding]

11

⁺† Maria stont voor dat graf, ende weende daer buyten, Als si nv weende, so sach si int graf,

+ C vers 11

12

ende sach twee engelen in witten cleederen sitten, eenen ten hoofde, ende den anderen ten voeten, daer si den lichaem Iesu geleyt hadden,

13

Ende die selue seyden tot haer, Wijf wat weent ghi? Sy seyde tot haer, Si hebben mijnen HERE wech ghenomen, ende ic en weet niet waer si hem geleyt hebben

14

Ende als si dat seyde, keerde si haer om, ende sach Ihesum staen, ende en wist niet dattet Iesus was. Iesus seyde tot haer,

15

Wijf, wat weendy? wat soect ghi? Si meynde het was een houenier, ende seide tot hem, HERE, hebt ghi hem wech gedragen, so segt mi waer ghi hem henen geleyt hebt, ic wil hem halen.

16

⁺Iesus seide tot haer, Maria Doen keerde si haer om ende seyde tot hem, Rabbi, dat heet Meester. Iesus seyde tot haer,

+ D vers 16

17

En roert mi niet aen, Want ic en ben noch nyet opgeuaren tot mijnen vader. Mer gaet henen tot mijnen broederen ende segt haer, Ick vare op tot mijnen vader, ende tot uwen vader, tot minen God ende tot uwen God.

18

Maria Magdalena quam ende vercondichdet den discipulen, ende seyde, ic heb den HERE gesien, ende dese dingen heeft hi tot mi gheseyt. *

19

† Des auonts opten seluen sabboth, doen die discipulen vergadert waren, ende die doren gesloten waren, wt vreesen der Ioden, so quam Iesus, ende ginc midden in, ende seyde tot haer, Hebt vrede.

20

⁺Ende als hi dat seyde, so thoonde hi haer die handen ende sijn side. Doen werden die discipulen verblijt, dat si den HERE sagen

+ E vers 20

21

Doen seide Iesus weder tot haer, Hebt vrede, Ghelijc als mi die vader ghesonden heeft, so seynde ick v

22

Ende doen hi dat seyde, so blies hijse aen, ende seyde tot haer, Ontfangt den heylighen gheest,

23

Den welcken ghi die ^a sonden verlaet, dien sijnse verlaten, ende den welcken ghijse ophoudt, dien sijnse opghehouden. *

[afbeelding]

a Sonden verlaten, dat is yemant te ontfanghen inde vergaderinge der kercken oft der geloouigher, ende ter contrarien, dye sonden ophouden is hem wtsluyten wt der vergaderinghe der geloouigher.

[p. *]

24

⁺† Thomas een vanden twaeluen, die daer hiet Didimus, en was bi haer niet doen Iesus quam.

+ F vers 24

25

Doen seyden die ander discipulen tot hem, Wi hebben den HERE ghesien. Hi seyde tot haer, Ten si dat ic in sijn handen sie dat licteeken der nagelen, ende legghe mijnen vinger in die licteekenen der nagelen, ende legghe mijn hant in sijn side, so en wil icx niet gheloouen.

26

Ende ouer acht dagen waren sijn discipulen weder daer binnen, ende Thomas met haer, Iesus quam doen die doren gesloten waren, ⁺ ende tradt int middel, ende seyde, Hebt vrede,

+ G vers 26

27

Daer na seyde hi tot Thomam, Reyct uwen vinger herwaerts, ende siet mijn handen, ende reyct v hant herwaerts, ende steectse in mijn side, ende en sijt niet ongelouich, mer gheloouich.

28

Thomas antwoorde ende sprac tot hem, Mijn HERE ende mijn God.

29

Iesus seyde tot hem, Want ghi ghesien hebt Thoma, so hebdy ghelooft, salich sijn si die niet en sien ende nochtans gheloouen.

30

Iesus dede ooc veel ander teekenen voor sijn discipulen, die niet ghescreuen en sijn in dit boeck.

31

Maer dese sijn ghescreuen, op dat ghi soudt gheloouen, dat Iesus is Cristus die sone Gods, ende op dat ghi door dat ghelooue dat leuen soudt hebben, in sinen name. *