Den Bybel met groter neersticheyt ghecorrigeert (Liesveltbijbel 1542)

Van veel schoonder leeren in gelijckenisse, Ende hoe Iesus thien malaetsche reynichde, ende hen luyden voorseyde vanden laetsten tijt.

Dat .xvij. Capittel

1

⁺† HI seide tot sinen discipulen, het is onmogeliken datter geen argernisse en come, ⁺ mer wee dien door welcken si comen,

+ A vers 1

+ matthei xviij.a.

2

het waer hem beter, datmen eenen molensteen hem aenden hals hinge, ende worpe hem in die zee, dan hi eenen van desen cleynen argerde.

3

Wacht v, ist dat v broeder in v sondicht, so straft hem, ende ist dat hi hem betert so vergeuet hem,

4

ende ist dat hi seuenmael sdaechs in v sondicht, ende seuenmael des daechs weder quaem tot v ende seyde, het berout mi, so suldi hem dat vergheuen.

5

⁺Ende die Apostelen seiden tot den HERE, sterct ons gelooue.

+ B vers 5

6

Die HERE seide. Waert dat ghi geloue hadt als een mostaert saet, ende seydet tot desen moerboom, trect v wt, ende verset v in dat meyr, so soude hi v ghehoorsaem sijn.

7

Wie is onder v die eenen knecht heeft, die hem ploeget oft die beesten weydet, wanneer hi tot huys coemt vanden velde, dat hi tot hem segge, gaet terstont ende sedt v ter tafelen?

8

Ist niet also dat hi tot hem seyt. Bereyt dat ic dat auontmael ete, scort v, ende dient my, so lange ic ete ende drincke, dan sult ghi ooc eten ende drincken.

9

⁺Danct hi ooc den seluen knecht dat hi gedaen heeft dat hem beuolen was? Ic en meyns niet.

+ C vers 9

10

Also ooc ghy, wanneer ghi alle dat gedaen hebt, dat v beuolen is, so segget wi sijn onnutte knechten, wi hebben ghedaen dat wi te doen sculdich waren. *

[afbeelding]

11

† Ende het geschiede doen hi reysde na Ierusalem, tooch hi midden door Samarien ende Galileen,

12

⁺Ende als hi in een casteel quam, ontmoeten hem thien malaetsche mannen, die stonden van verre,

+ D vers 12

13

ende hieuen op haer stemmen ende seyden. Iesu, lieue meester ontfermt v onser.

14

Ende doen hise sach, seide hi tot haer. Gaet henen ende vertoont v den priesteren. Ende het gesciede doen si henen ginghen, worden si reyn.

15

Ende een onder hen, doen hi sach dat hy gesont geworden was, keerde hi om, ende prees God, met luyder stemmen,

16

ende viel op zijn aensicht tot sinen voeten, ende dancte hem, ende dat was een Samaritaen,

17

⁺Iesus antwoorde ende seyde. Sijn uwer niet thien reyn geworden?

+ E vers 17

18

waer sijn die negen? en is daer niemant anders geuonden, die wederom souden hebben gecomen, ende Gode den prijs gegeuen, dan alleen dese vreemde?

19

ende hi seyde tot hem, staet op, gaet wech, want v gelooue heeft v geholpen. *

[p. *]

20

⁺† Mer doen hem geuraecht wort vanden pharizeen, wanneer coemt dat rijcke Gods, Antwoorde hi hen, ende seyde, Dat rijc Gods en coemt niet met wtwendigen gebaer,

+ F vers 20

21

noch men sal ooc niet seggen, siet hier of daer ist, want siet, dat rijc Gods is inwendich in v

22

Ende hi seide tot sinen discipulen, den tijt sal comen dat ghi sult begeeren te sien eenen dach des menscen sone ende ghi en sult dien niet sien,

23

ende si sullen tot v seggen, siet hier siet daer, mer en gaet niet ende en volcht ooc niet,

24

want also den blixem bouen vanden hemel blixemt, ende licht ouer al dat onder den hemel is, also sal ooc des menschen sone in sinen dagen sijn,

25

mer te voren moet hi vele lijden ende verworpen worden van desen geslachte.

26

Ende also het gesciede totter tijt Noe, ⁺ so salt ooc gescien inden dage des menschen sone,

+ matthei xiiij.c

27

si aten, si droncken, si trouden ende worden getrout, tot op den dach toe, dat Noe in die Arcke ginc, ⁺ Ende doen quam die diluuie, ende verdedese alle.

+ Ge. xix f.

28

Des seluen gelijcken also gesciede tot den tijde Loth, si aten, si droncken, si cochten, si vercochten, si planten, si tymmerden,

29

mer op den dach dat Loth wt Sodoma ginc, doe regendet vier, ende solfer vanden hemel, ende vernieldese alle.

30

Na die wise salt gaen op dien dach als des menscen sone geopenbaert sal worden.

31

Inden seluen dage, wie op dat dack is, ende sinen huysraet in huis, ⁺ die en climme niet neder dien te halen. ⁺ Desgelijc, die op den velde is, die en keere niet omme, na dat ghene dat achter hem is.

+ G vers 31

+ matthei xiiij.d

32

Ghedenct des wijfs Loth.

33

Wie daer soeckt zijn ziele te behouden, die salse verliesen, ende wiese verliesen sal, salse totten leuen baren.

34

Ic segge v, op dien dage sullender twee op een bedde liggen, ende een sal aengenomen worden, die ander sal gelaten worden,

35

twee sullender malen met malcanderen, een sal aengenomen worden, die ander sal verlaten worden.

36

Ende si antwoorden ende seyden tot hem, HEERE waer,

37

Hi seyde tot haer, waer dat aes is, daer sullen ooc die aernen comen.